Qafqazagency.ir xəbər verir ki, Müqəddəs Rəhbərin müşaviri vurğulayıb ki, İran Rusiya ilə, ya da onsuz, Qafqazda Amerika dəhlizinin yaradılmasının qarşısını alacaq. Çünki bu dəhliz regionun təhlükəsizliyini təhdid edir və onun geosiyasi xəritəsini dəyişir.
Aliəkbər Vəlayəti, Müqəddəs Rəhbərin beynəlxalq məsələlər üzrə müşaviri, “Tasnim” xəbər agentliyinin müxbiri ilə eksklüziv müsahibəsində, ABŞ-ın keçmiş prezidenti Donald Trampın “Zəngəzur dəhlizi” adlanan layihə və onun bu keçid yolunu 99 illiyə icarəyə götürmək iddiası barədə suala cavab olaraq deyib: “Cənubi Qafqaz elə sahibsiz bölgədir ki, Tramp onu icarəyə götürsün? Qafqaz dünyanın ən həssas coğrafi nöqtələrindən biridir və bu keçid Trampın mülkiyyətində olan dəhlizə yox, onun muzdlularının məzarlığına çevriləcək.”
O, İranın həmişə “Zəngəzur dəhlizi” adlanan şeyin yaradılmasına qarşı olduğunu vurğulayaraq bildirib ki, bu dəhliz regionun geosiyasi mövqeyini dəyişir, sərhədləri yerindən oynadır və Ermənistanın parçalanması məqsədilə dizayn olunub.
Müqəddəs Rəhbərin müşaviri İranın bu məkrli dəhlizin açılmasına qarşı mövqeyini nümayiş etdirmək üçün atdığı qəti addımlara toxunaraq deyib: “Türkiyə və Azərbaycan bu dəhlizin yaradılmasında israr edəndə, İran İslam Respublikası Silahlı Qüvvələrinin o vaxtkı Baş Qərargah rəisi şəhid general Baqirinin rəhbərliyi ilə İranın şimal-qərbində bir neçə hərbi təlim keçirildi ki, bu da ölkəmizin bu addımın qarşısını almaq üçün hazır və ciddi olduğunu göstərdi.”
Vəlayəti “başqa bir ölkənin dəhlizi icarəyə götürməsi sadəlöhv bir sözdür və Tramp özünü sadəlöhv göstərir” deyərək əlavə edib: “Trampın dünyanın bu tərəfindən gedib o tərəfdəki dəhlizi icarəyə götürmək iddiası, kimin isə buradan gedib Panama kanalını icarəyə götürməsi kimidir! Bu, mümkün olmayan bir sözdür və baş verməyəcək.”
O, “Tramp həmişə olduğu kimi, parıltılı amma məzmunsuz sözlər deyir” deyərək əlavə edib: “Tramp elə bil ki, daşınmaz əmlak agentidir və torpaq və ya bölgə icarəyə götürmək istəyir!”
İranın sabiq xarici işlər naziri bu dəhliz planının gələcəkdə Ermənistanın parçalanması ilə nəticələnəcəyini və erməni xalqının buna qəti şəkildə qarşı olduğunu bildirib: “Heç bir millət öz torpağının parçalanmasına razı olmaz, hətta əgər hökumətləri təəssüf ki, qeyri-sabit mövqe tutsa belə.”
Vəlayəti Ermənistanın baş naziri Paşinyanın İran səfərinə işarə edərək deyib ki, o, bu layihənin aydın zərərləri və məkrli mahiyyətinə görə İranın mövqeyini dəstəklədiyini və dəhlizin yaradılmasına qarşı olduğunu bildirmişdi.
O, Zəngəzur dəhlizinin İran sərhədlərində edəcəyi dəyişikliklərə və ölkəmizin şimal və şimal-qərb əlaqələrinin yalnız Türkiyə ilə məhdudlaşmasına səbəb olacağına diqqət çəkərək bildirib: “Bu məkrli plan həyata keçərsə, Cənubi Qafqazın təhlükəsizliyi risk altına düşəcək. Ona görə də İran Rusiya ilə, ya da onsuz, Cənubi Qafqazın təhlükəsizliyi istiqamətində hərəkət edəcək. Əlbəttə biz strateji baxımdan Rusiyanın da bu dəhlizə qarşı olduğuna inanırıq.”
Müqəddəs Rəhbərin müşaviri ABŞ-ın “bu dəhlizin Xəzərdən enerji tranziti üçün icarəyə götürüləcəyi” iddiasına toxunaraq xatırladıb ki, Xəzər dənizi yarıbağlı dənizdir və yalnız qonşu ölkələrə məxsusdur. Bu dənizdən neft və qazın keçməsi üçün bütün sahilyanı ölkələrin razılığı lazımdır. Son həftələrdə İran və Rusiya Xəzərdə birgə hərbi təlim keçirdi. Bu təlimin mesajı o idi ki, əgər bu bölgədən kənar bir qüvvə hərəkət etsə, biz onun qarşısında duracağıq.
Vəlayəti bu dəhlizin sadəcə ticarət keçidi olmadığını, əksinə, İran və bəzi qonşu ölkələrə qarşı siyasi bir məkr planı olduğunu bildirərək əlavə edib: “NATO üzvü olan Türkiyədən əlavə, digər NATO ölkələri də bu bölgədə mövcud olmaq istəyir və NATO bir ilansayağı İranla Rusiya arasına girəcək. Amma İran buna icazə verməyəcək.”
O qeyd edib: “Putin dəfələrlə Ukrayna barədə deyib ki, əgər Ukrayna NATO-ya üzv olsa və Moskvaya yaxınlaşsa, hərəkət edəcək. Biz də NATO-nun İranın şimal sərhədlərinə yaxınlaşmasına icazə verməyəcəyik. Bu mövzuda biz də inanırıq ki, qarşısını almaq müalicədən yaxşıdır!”
Naxçıvanla Azərbaycanın əlaqəsi üçün dəhlizə ehtiyac yoxdur
İranın sabiq xarici işlər naziri deyib: “İranın şimal bölgələrinin əhalisi — Qərbi və Şərqi Azərbaycan, Ərdəbil, Gilan, Deyləm, Mazandaran, Xorasan və digər bölgələr — İranın şimal-qərbindəki hər hansı məkrli plana qarşı dayanacaqlar. Bu xalq tarix boyu Əməvilərdən tutmuş bu torpaqları işğal etmək istəyən Osmanlılara qədər hamının qarşısında dayanıb və bu gün də bu bölgələrdə fitnəyə icazə verməyəcək.”
Vəlayəti Naxçıvanla Azərbaycan torpaqları arasında əlaqə üçün dəhlizə ehtiyac olmadığını, bunun üçün İranın öz ərazisindən istifadə edilə biləcəyini vurğulayıb: “Bu bölgənin münasibətləri təkcə Azərbaycan və Ermənistanla məhdud deyil, geosiyasi dəyişikliklər İran sərhədlərini də dəyişdirəcək. Buna görə də biz öz maraqlarımızı tam güclə müdafiə etmək hüququna malikik.”
