Zərdüşt Əlizadə: “İndiki terror dalğasının əsas günahkarı Ərdoğanın özü və onun apardığı siyasətdir”
Türkiyədə son zamanlar terror aktlarının artması müşahidə olunur. Son bir ilin statistikasına nəzər saldıqda Türkiyədə 300-dən çox adamın terror nəticəsində həyatını itirdiyini görə bilərik. Törədilən hadisələr nəticəsində 1600 nəfərdən çox insan isə yaralanıb. Bu statistikaya yalnız 2016-cı ilin 28 iyun tarixində Atatürk Hava Limanında törədilən terror aktı da daxil olmaqla, il ərzində baş verən hadisələr aiddir. Bu müddətdən keçən yarım il ərzində Türkiyədə bir neçə terror hadisəsinin törədildiyini nəzərə alsaq, qurbanların sayının dəfələrlə artacağı istisna deyil. Mənzərə göz önündədir. Türkiyədə sabitlik çoxdan pozulub və vəziyyət hər ötən gün daha da pisləşir.
Bəs görəsən bu sabitliyi bərpa etmək üçün Türkiyə hökuməti hansı addımları atmalıdır?
Mövzunu İslaminSesinə tanınmış politoloq Zərdüşt Əlizadə şərh edib. Politoloq bildirib ki, Türkiyə hökuməti hazırda ölkədə sabitliyi zor gücünə bərpa etməyə çalışır. Guya terrorla mübarizə aparır. Lakin göründüyü kimi bu heç bir nəticə vermir: “ Öncə terror yaradan səbəbləri aradan qaldırmaq lazımdır. İnsanlara hörmət edən, onların və milli azlıqların hüquqlarını tanıyan, ədalətli dövlət anlayışını təlqin edən siyasət yürüdülməlidir”.
Zərdüşt Əlizadənin sözlərinə görə, Türkiyə bir zamanlar “Kürd açılımı” adı altında uğurlu siyasət həyata keçirirdi: “ Hökumət kürdlərlə dialoqa getmişdi, onların hüquqlarını tanıyırdı, bərpa edirdi. Bu səbəbdən də, ölkədə terror demək olar ki, yox idi. Lakin sonradan hökumət kürdlərə qarşı siyasəti radikallaşdırdı. Siyasətin sərtləşməsi ilə ölkəni terror dalğası bürüməyə başladı. İndiki terror dalğasının əsas günahkarı Ərdoğanın özü və onun apardığı siyasətdir”.
Politoloq qeyd edib ki, Türkiyənin xaricdə xeyli sayda düşmənləri var: “ Əgər Ərdoğan öz siyasətində dəyişikliyə əl atmasa, ölkədə terror dalğası davam edəcək. Xarici düşmənlər isə bundan istifadə edərək terrorçulara dəstək verib, daxildə ixtilaflar törədəcəklər”.
