Qafqazagency.ir-un verdiyi xəbərə görə, bu gün Tehranda İran və Azərbaycan arasında tezlik spektrinin tənzimlənməsi üzrə ikitərəfli iclas işə başlayıb.
Bununla əlaqədar İranın Radiokommunikasiya və Qaydaların Tənzimlənməsi Təşkilatı məlumat yayıb.
Məlumata görə, üçgünlük keçirilən iclasda iki ölkənin rabitə və informasiya texnologiyaları sahəsində yüksək səviyyəli rəsmilər iştirak edirlər.
İclasda 2300, 2600 və 3500 Mhz tezlik zolaqlarında mobil şəbəkələrin uzlaşdırılması, mobil şəbəkələr arasında koordinasiya üsullarının müəyyənləşdirilməsi, sərhəd bölgələrində keçirilmiş siqnal ölçmə testlərinin (drive test) nəticələrinin təhlil olunması kimi məsələlər müzakirə olunacaq.
Görüşün əsas məqsədi sərhəd bölgələrində rabitə siqnallarının toqquşmasının qarşısını almaq və tezlik zolaqlarından optimal istifadəni təmin etməkdir.
