Müsəlman Birliyi Hərəkatının sədri Taleh Bağırzadənin cəzası ağırlaşdırılıb.
Qafqazagency.ir xəbər verir ki, Bu barədə Meydan TV-yə məlumatı ilahiyyatçının ailəsi verib.
Ailəsinin bildirdiyinə görə, Taleh Bağırzadə 12 saylı Cəzaçəkmə Müəssisəsindən qapalı rejimli həbsxanaya – Umbakıya köçürülüb.
Qərarı 12 saylı Cəzaçəkmə müəssisəsinin rəhbərliyinin təqdimatı əsasında iyulun 18-də Qaradağ rayon Məhkəməsi çıxarıb.
Taleh Bağırzadə 2015-ci ildə Nardaran hadisələri ilə bağlı dövlət çevrilişinə cəhd, silah-sursat saxlama və qəsdən adam öldürmə ittihamları ilə həbs edilərək 20 il azadlıqdan məhrum edilib. O, bütün ittihamları rədd edib.
Yaxınları bildirib ki, Hacı Taleh həbsxanada olan uçquna etiraz olaraq günlük sayıma çıxmayıb və cəza olaraq günlərlə karserə salınıb.
“İyun ayında orada uçqun olmuşdu. Uçqun nəticəsində bir nəfər həyatını itirmişdi.Ondan sonra bəzi təhlükəli yerləri bağladılar və uçqunda olan məhkumlar ki, var onların bəzilərini Lənkərandakı Cəzacəkmə Müəssisəsinə göndərdilər, bəzilərini isə digər binalara yerləşdirdilər. Məsələn, bir binada 200 nəfər qalırdısa, onu artırdılar 400-500 nəfərə və ondan sonra da sıxlıq yarandı, heç bir iş görülmədi”.
Ailəsi bildirir ki, iyun ayının 13-ü gecə saat 2-3 radələrində həmin uçqun olan binada dam örtüyünün də çökməsi nəticəsində məhbuslar təşvişə düşüblər, binadan çıxmaq üçün bağlı olan qapıya tərəf qaçıblar və basabas yaranıb.
“Məhkumlar çölə çıxmaq istəsə də, qapı açılmayıb. O sıxlıqda ombası çıxan, ayağı qırılan, başı partlayan olub. O qədər məhkum güc edib, qapını sındırıb, küçəyə çıxıblar. Yəni buna etiraz olaraq yoldaşım Hacı Taleh də etiraz edib ki, biz məhkumların canı sizin üçün bu qədər dəyərsizdir? Cəza çəkən məhkumlar ola bilər ki, hansısa cəzaya görə burdadılar. Amma bu o demək deyil ki, məhkumu öldürəsən, heç bir iş də görməyəsən”.
Ailənin sözlərinə görə, baş verənlərə etiraz etdiyi üçün məhbuslar demək olar hər gün gündə iki dəfə sayıma çıxarılıblar. Taleh Bağırzadə isə buna da etiraz edib.
“Etiraz üçün sayıma çıxmadı. Ona görə Hacı Talehi saldılar “karsa”. Talehin da tələbi o idi ki, bizi də başqa cəzacəkmə müəssisəsinə köçürün, burada tikinti işi getsin, yəni bu binalar yenilənsin. Onu etiraz etdiyinə görə saldılar karsa. 3 sutka bir verdilər, daha sonra 5 sutka bir verdilər, ondan sonra 12 sutka verdilər. Yəni 1 aya yaxındır karserdədir”.
Ailəsi bildirir ki, bundan sonra məhkəmənin qərarı ilə Taleh Bağırzadəni 1 illik qapalı tipli həbsxanaya – Umbakıya köçürülüb.
“Taleh Bağırzadə Umbakı qətiyyən istəmir. Belə də şayiə yayırlar ki, guya Hacı Taleh özü deyir ki, Umbakıya getsin. Əlbəttə ki onu istəmir. Sadəcə yoldaşımın tələbi olub ki, bizləri başqa cəzaçəkməyə göndərin, burada tikinti getsin”.
“Hacı Taleh həmişə vurğulayır ki, bizim üçün fərqi yoxdur istər 12 saylı cəzaçəkmə olsun, istər başqa cəzaçəkmə müəssisəsi olsun yenə də hər bir mübarizəmizi davam edəcəyik. Yenə də Hacı Taleh digər illərdəki kimi, digər zamanlardakı kimi, digər etirazları kimi, bu etirazı da bu dəfə qapalı tipli həbsxanaya getməyi də özünə görə olmadı. Oradakı məhkumlara görə oldu” – ailəsi belə deyir.
Ailəsinin sözlərinə görə, Taleh Bağırzadənin yerinin dəyişməsi ilə bağlı hələlik məhkəməyə müraciət etmək fikri yoxdur.
