Təbriz Universitetinin bir qrup tələbəsi iyunun 21-də aksiya keçirərək “İraq-Şam islam dövləti” (İŞİD) terrorçularına etiraz bildiriblər.

tələbələr Azərbaycan və fars dillərində “İŞİD-ə yox”, “Biz bölgədə zorakılığa yol verilməsini istəmirik”, “Terroristə yox” və “Biz bölgədə etnik və dini fundamentalizmin və İŞİD-in törətdiyi cinayətləri məhkum edirik” yazılmış plakatlar gəzdirərək İraqda dinc əhaliyə qarşı zorakılıqlara son qoyulmasını tələb ediblər.
Tələbələr bəyanat yayaraq İraqda yaranmış vəziyyətdən sui-istifadə edərək türkmənlərin yaşadığı Kərkükü və digər bölgələri ələ keçirən İraqın Kürdüstan muxtariyyəti hökumətinin addımını kəskin məhkum ediblər. Bəyanatda deyilir: “İraq Kürdüstanı muxtariyyətinin türkmənlərin hüquqlarını tapdalayaraq Kərkükü işğal etməsi, bu bölgənin neftini ələ keçirməsi yolverilməzdir. Bu addım bölgədə yalnız terrorizmin və zorakılığın daha da genişlənməsinə gətirib çıxaracaq”.