Qafqazagency.ir xəbər verir ki, Rusiya Federasiyasının Xarici İşlər Nazirliyi (XİN) 13 iyun tarixində İsrailin İrana qarşı həyata keçirdiyi hücumları qəti şəkildə pisləyib və İranın nüvə proqramı ətrafında yaranan fikir ayrılıqlarının yalnız diplomatik yolla həll edilməsinin vacibliyini vurğulayıb.
Nazirliyin bu mövqeyi rəsmi saytında yerləşdirilən açıqlamada bildirilib.
“Biz qəti şəkildə inanırıq ki, İrana qarşı hücumları planlaşdıran, hazırlayan və həyata keçirən tərəflər nə qədər izah etməyə çalışsalar da, İranın nüvə proqramı ilə bağlı problemlərin hərbi yolla həlli mümkün deyil və bu məsələ yalnız sülh, siyasi və diplomatik vasitələrlə həll oluna bilər”, – deyə Rusiya XİN-in açıqlamasında qeyd olunub.
Eyni zamanda, Rusiya tərəfi münaqişə tərəflərini təmkinli olmağa çağırıb və Yaxın Şərqdə genişmiqyaslı müharibənin qarşısının alınmasının vacibliyini vurğulayıb.
Rusiya XİN həmçinin bəyan edib ki, bu hücumların tam məsuliyyəti İsrailin üzərinə düşür, lakin Qərb dövlətlərinin də müəyyən məsuliyyəti daşıdığını qeyd edib. Belə ki, bu dövlətlər MAQATE-nin İdarə Heyətində İrana qarşı isteriya yaratmaqla vəziyyəti gərginləşdiriblər.
Nazirlik əlavə edib ki, İsrailin İrana zərbələri MAQATE İdarə Heyətinin sessiyası zamanı və İran ilə ABŞ arasında növbəti dolayı təmaslar raundundan bir gün əvvəl baş verib. Bu baxımdan, Rusiya MAQATE-dən bu hadisələrə obyektiv və ölçülüb-biçilmiş qiymət verməsini gözləyir.
