İranın Azərbaycan Respublikasındakı səfirliyinin sözçüsü İslam Respublikasının qondarma Dağlıq Qarabağ Respublikasında konstitusiya haqda 20 fevral referendumunu rəsmən tanımadığını bildirib.
Aran Newsun məlumatına görə, İran İslam Respublikasının Azərbaycan Respublikasındakı səfirliyinin sözçüsü Məhəmməd Nəcəfi qondarma “DQR”-da konstitusiya ilə əlaqədar referendumun keçirilməsi haqda bildirib: Tehran Dağlıq Qarabağ münaqişəsinin beynəlxalq qaydalar və Azərbaycanın ərazi bütövlüyü çərçivəsində həll olunmasını istəyir.
Nəcəfi əlavə edib: İran Qarabağı müstəqil ölkə kimi tanımır. Buna görə orada keçirilən referendum və regionun sülh və təhlükəsizliyinə təhdid olacaq hər bir addımı qəbul etmir və bu məsələnin tez bir zamanda həll olunacağını və bölgəyə təhlükəsizlik və stabilliyin hakim olacağına ümid bəsləyir.
Rusiya Xarici İşlər Nazirliyinin İctimai Əlaqələr şöbəsi də qondarma Dağlıq Qarabağ Respublikasında konstitusiyaya islahat haqda referendumun keçirilməsini qeyri-qanuni adlandırıb və bildirib: Moskva qondarma Dağlıq Qarabağ Respublikasını bir ölkə və dövlət kimi rəsmən tanımır və Qarabağ münaqişəsi ATƏT-in Minsk Qrupu həmsədrlərinin səyi və siyasi ideyaların çərçivəsində həll edilməlidir.
ABŞ-ın Azərbaycan Respublikasındakı sabiq səfiri Metyu Brayza da deyib: Qondarma Dağlıq Qarabağ Respublikasında referendumun keçirilməsi planı ilə Ermənistanın regiondakı mövcud böhranın həlli üçün maraqlı olduğu müşahidə olunmur və bu məsələ münaqişənin həllini daha da mürəkkəbləşdirir.
Bundan öncə Trend İnformasiya Agentliyi də bildirib: Azərbaycan Respublikası Xarici İşlər Nazirliyi bir bəyanatda qondarma Dağlıq Qarabağ Respublikasında referendumun keçirilməsini qeyri-qanuni adlandırıb.
Azərbaycan Respublikası Xarici İşlər Nazirliyi həmçinin beynəlxalq dairələrdən Dağlıq Qarabağ münaqişəsinin həlli istiqamətində konstruktiv addımlar atmalarını istəyib.
Türkiyə Xarici İşlər Nazirliyi də ötən gün bir bəyanatda bildirib: Ankara Qarabağda referendumun keçirilməsini BMT Təhlükəsizlik Şurasının qətnamələri və ATƏT-in prinsiplərinə zidd hesab edir.
Türkiyə Xarici İşlər Nazirliyi əlavə edib: Belə hərəkətlər Qarabağ münaqişəsinin dinc yolla həllinə zərbə vurur.
Gürcüstan hökuməti də qondarma Dağlıq Qarabağ Respublikasında referendumun keçirilməsini qeyri-qanuni adlandırıb.
Dağlıq Qarabağ münaqişəsi 1988-ci ildə Ermənistanın Azərbaycan Respublikasına qarşı ərazi iddiası ilə başlayıb. Erməni silahlı birləşmələrinin hücumları nəticəsində Azərbaycan Respublikasının Qarabağ və ətraf yeddi rayonu işğal olunub. 1994-cü il may ayında münaqişə tərəfləri arasında atəşkəs rejimi bərqərar olunub. İndiyə qədər Rusiya, Fransa və Amerikanın həmsədrliyi ilə Minsk Qrupunun vasitəçiliyi bu münaqişənin dinc yolla həllinə öz töhfəsini verə bilməmişdir.
