Qafqazagency.ir xəbər verir ki, İran İslam Respublikasının Prezidenti Avrasiya İqtisadi İttifaqının Ali Şurasının iclasına ünvanladığı mesajda vurğulayıb: İran ilə bu ittifaqa üzv ölkələr arasında əməkdaşlıq milli suverenliklərin gücləndirilməsi yolu ilə güclü bir regionun yaradılmasına yönəlmiş uzunmüddətli strateji yanaşmadır.
Pezeşkian bildirib: Mədəni və tarixi ortaq cəhətlərə, eləcə də coğrafi yaxınlıq üstünlüyünə söykənərək regional inteqrasiyanın uğurlu modelini ortaya qoya bilərik. O, yüksək əzm və möhkəm iradə ilə bu tarixi fürsətin ortaq inkişaf üçün dönüş nöqtəsinə çevrilməsinə çağırış edib.
İran prezidenti qeyd edib: Gələcək, qarşılıqlı əməkdaşlıq və etimada əsaslanaraq inkişaf yolunu açan xalqlara məxsusdur.
O, əlavə edib ki, Avrasiya İqtisadi İttifaqı İran İslam Respublikasının xarici siyasəti və iqtisadi diplomatiyasında xüsusi yer tutur və qarşılıqlı azad ticarət sazişinin icrası, eləcə də bu ittifaqda müşahidəçi statusunun əldə olunması İranın bu mühüm iqtisadi qurumun fəaliyyətində təsirli və məhsuldar iştirakının başlanğıcı olacaq.
Pezeşkian vurğulayıb ki, İran ilə Avrasiya İqtisadi İttifaqına üzv ölkələr arasında ticarət potensialı mövcud dövriyyədən xeyli yüksəkdir və bu artım tendensiyası davam edəcək, inşallah yaxın gələcəkdə qarşılıqlı ticarətdə ciddi sıçrayışın şahidi olacağıq.
