“Peyğəmbərləri Qobustana göndərərdiniz”

İslamazeri.az-ın verdiyi xəbərə görə, dünən Beynəlxalq Avrasiya Mətbuat Fondunun təşkilatçılığı ilə “Dini və Milli Tolerantlıq – Millətlərası münasibətlərin inkişaf etdirilməsində medianın rolu” adlı forum keçirilib. Forumda çıxış edənlər arasında Dini Qurumlar İşi üzrə Dövlət Komitəsinin sədri Mübariz Qurbanlı olub. O, bütün dinlərin hazırda baş verənləri tənqid etdiyini söyləyib və əlavə edib: “Heç bir din insan ölümünü dəyərləndirmir. Maraqlıdır peyğəmbərlərdən hansısa bu gün sağ olsaydı dünyanın hansı ölkəsində yaşamaq istərdi?! Mən belə düşünürəm ki, Azərbaycanda yaşamaq istəyərdilər”.

Müsəlman Birliyi Hərəkatının sədri və ilahiyyatçı Tale Bağırzadə öz rəsmi facebook səhifəsində məsələyə münasibət bildirib: “Günümüzün reallığını ifadə edən hakimiyyət nümayəndəsi Mübariz Qurbanlının mübarək kəlamı: “Peyğəmbərlərdən hansısa bu gün sağ olsaydı, dünyanın hansı ölkəsində yaşamaq istərdi?! Mən belə düşünürəm ki, Azərbaycanda yaşamaq istəyərdilər”.

Cənab Qurbanlı, sizin fikirlərinizlə tam razıyam. Çünki hakimiyyətin etdiyi zülmlər səbəbindən Peyğəmbərlər mübarizə üçün Azərbaycana gələr və şübhəsiz onları da Qobustana göndərərdiniz. Necə ki, Peyğəmbərlərin ardıcıllarını Qobustana göndərmisiniz!”