Ermənistanın Baş naziri Nikol Paşinyan, İran İslam Respublikası ilə ikinci sərhəd körpüsünün açılması ilə bağlı razılıq əldə olunduğunu açıqlayıb.
Qafqazagency.ir xəbər verir ki,Paşinyan bu açıqlamanı İrəvanda İran Prezidenti Məsud Pezeşkian ilə görüşdən sonra keçirdiyi mətbuat konfransında verib. O bildirib ki, İran və Ermənistan, Araz çayı üzərində yerləşəcək ikinci sərhəd körpüsünün istifadəyə verilməsi üçün razılıq əldə ediblər.
O qeyd edib ki, bu qərar, Tehran ilə İrəvan arasında gündəlik artmaqda olan ticarət dövriyyəsini nəzərə alaraq qəbul olunub.
Ermənistanın Baş naziri əlavə edib ki, iki ölkə arasındakı ticarət dövriyyəsi hal-hazırda 1 milyard ABŞ dollarına çatıb və Tehran ilə İrəvan bu rəqəmi 3 milyard dollara çatdırmaq üçün davamlı səylər göstərirlər.
Paşinyan vurğulayıb ki, İranın Avrasiya İqtisadi İttifaqı ilə əməkdaşlığı bu məqsədə çatmaq üçün əsas şərtlərdən biridir.
O həmçinin əlavə edib: İran və Avrasiya İqtisadi İttifaqı arasında qüvvəyə minmiş azad ticarət sazişi hər iki ölkənin sahibkarları üçün yeni imkanlar yaradır.
