Bu gün, sentyabrın 25-də Naxçıvanda 4 nəfər tərəfindən təcavüzə məruz qalan uşağın işi üzrə təqsirli bilinənlərdən birinin – Pənahov Sənan Vaqif oğlunun Apellyasiya Məhkəməsi keçirilib.
Qafqazagency.ir xəbər verir ki,Prosesə hakim Səxavət Hüseynov baxıb.
Naxçıvanda 15 yaşlı yeniyetmə 4 nəfər tərəfindən təcavüzə məruz qalıb. Onlardan 3 nəfərinin hərbçi və 1 nəfərinin isə mülki vətəndaş olduğu bildirilir.
Hadisədən sonra uşaq oxuduğu məktəbdən və kursdan qovulmuşdu. Sonradan uşaq oxuduğu məktəbə bərpa olunub.
Ata həbs olunanlara verilən cəzadan narazıdır.
Zərərçəkənin atası Novruz Musayev Meydan TV-yə bildirib ki, məhkəmə bu iş üzrə təqsirləndirilmiş Pənahov Sənan Vaqif oğlu barəsində qərarı dəyişdirib. Belə ki, onun cəzası 9 aydan 2 ilə artırılıb.
“Prokurorluq nümayəndə göndərmişdi ki, həqiqətən də Pənahov Sənana az cəza verilib. 9 ay cəza verən hakim Hüseynov Səxavət barəsində də protokol tərtib olunub”.
Ata Novruz Musayev həmçinin bildirib ki, yeniyetməyə təcavüzdə ittiham olunan mülki vətəndaşın – Əlizadə Barışın məhkəməsi ona xəbər verilmədən keçirilib.
“Bu gün, mülki vətəndaş Əlizadə Barışın vəkili ilə görüşdüm. Mənə dedi ki, məhkəmə keçirilidi, iş verildi. Dedim ki, mənə heç bir bildiriş gəlməyib, xəbərdarlıq edilməyib necə məhkəmə keçirilə bilər. Bildirdi ki, artıq məhkəmə olub, ona 4 ildən çox iş kəsilib”, – deyə Novruz Musayev bildirib.
Bu iş üzrə təqsiri sübuta yetirilmiş 1 il həbs cəzası alan hərbçi Əsədov Səbuhi Səməd oğlunun oktyabrın 3-də Apellyasiya Məhkəməsi keçiriləcək. Məhkəmədə Səbuhi Əsədovun cəzasının artırılması işinə baxılacaq.
Ata bildirir ki, oğluna təcavüz edənlərdən daha biri, Səbuhi Əsədovun qardaşı Aras Əsədov isə hələ də azadlıqdadır.
