Qafqazagency.ir xəbər verir ki, Monteneqronun paytaxtında bir sakinin bıçaqlanmasından sonra baş verən kütləvi hücumlar onlarla türk və azərbaycanlının saxlanılması ilə müşayiət olunub.
Oktyabrın 25-də yerli media Podqoritsa şəhərində bir Monteneqro vətəndaşının mübahisə zəminində bıçaqlandığını, buna görə bir Türkiyə və bir Azərbaycan vətəndaşının şübhəli qismində saxlanıldığını xəbər verib.
Yaralanan şəxsin həyati təhlükəsinin olmadığı bildirilir.
Növbəti gün isə onlarla yerli sakinin Türkiyə nömrəli avtomobillərə hücum etdiyi, bir qrup türkün təhlükəsizlik naminə bir kazinoya sığınmağa məcbur olduğu xəbəri yayılıb.
Hücumdan sonra Podqoritsa polisi yaşayış icazəsi olmayan 45 Türkiyə və Azərbaycan vətəndaşının da saxlanıldığını bildirib.
Saxlanılan şəxslərdən 7-sinin cərimə edildiyi, 8-inin isə ölkədən deportasiya ediləcəyi bildirilib.
Baş nazir Miloyko Spajiç oktyabrın 27-də “təcili prosedurla” Türkiyə vətəndaşları üçün keçərli olan vizasız rejimin müvəqqəti olaraq dayandırılması ilə bağlı qərar veriləcəyini deyib.
Türkiyə Xarici İşlər Nazirliyi hadisələrin “təəssüf doğurduğunu” qeyd edib, Monteneqro rəsmiləri ilə əlaqə saxlanıldığını və Türkiyə vətəndaşlarının təhlükəsizliyi üçün tədbirlərin görüldüyü barədə razılıq əldə edildiyini açıqlayıb.
Azərbaycan tərəfi isə məsələ ilə bağlı açıqlama verməyib.
Monteneqro polisi ölkədə rəsmi qeydiyyatdan keçmiş 13 mindən çox Türkiyə vətəndaşının olduğunu açıqlayıb. Azərbaycanlıların sayı barədə rəsmi məlumat isə yoxdur.
Azərbaycan və Türkiyə vətəndaşları Monteneqroda 180 gün ərzində 90 gün viza və yaşayış icazəsinə ehtiyac olmadan qala bilirlər.
