Lahıc – Azərbaycan mədəniyyətinin incisi – REPORTAJ/FOTO

Azərbaycanın İsmayıllı rayonunda yerləşən Lahıc təkcə qədim bir yaşayış məskəni deyil, həm də minilliklərin yaddaşını yaşadan mədəniyyət incisidir. Böyük Qafqaz dağlarının ətəyində, saf və tərtəmiz təbiət qoynunda yerləşən bu qədim qəsəbə, həm mənəvi dəyərləri, həm də zəngin sənətkarlıq irsi ilə seçilir.

Qafqazagency.ir-un hazırladığı reportajı və fotoları təqdim edirik:

Lahıcda havanın saflığı, dağ çaylarının səsi və göz oxşayan təbii mənzərələr hər gələn qonağa sükunət və ruhi rahatlıq bəxş edir. Turizm baxımından mühüm əhəmiyyətə malik olan qəsəbə ilboyu yerli və xarici turistlərin maraq mərkəzindədir. Onları buraya yalnız təbiət deyil, həm də insanların istiqanlılığı və qonaqpərvərliyi cəlb edir. Lahıc sakinləri ənənələrinə bağlı, dini dəyərlərə hörmətlə yanaşan, qəlbi təmiz və səmimi insanlardır.

Lahıc həm də Azərbaycanın sənətkarlıq beşiyidir. Burada misgərlik, dəmirçilik, zərgərlik və ağac oymaçılığı kimi qədim peşələr bu gün də yaşadılır. Ustad sənətkarların əl işləri təkcə bölgə daxilində deyil, dünya bazarında da tanınır və dəyərləndirilir.

Köhnə daş evlər, dar küçələr, tarixi karvansaralar və sənət emalatxanaları ilə Lahıc, sanki orta əsrlərdən bu günə salamat gəlmiş canlı bir muzeyi xatırladır. Bu səbəbdəndir ki, Lahıc UNESCO-nun qeyri-maddi mədəni irs siyahısına daxil edilmişdir.

Lahıc – təbiətin, tarix və mədəniyyətin ahəngdar birliyi, Azərbaycan ruhunun dağlarda döyünən ürəyidir.

İndi isə dəyərli oxuyucularımız üçün Lahıcdan xüsusi müxbirimizin çəkdiyi şəkilləri sizinlə bölüşürük: