Qafqazagency.ir xəbər verir ki, Azərbaycanın İraqdakı səfiri Nasir Məmmədov Ərbəin ziyarəti ilə bağlı paylaşım edib:
Kərbəla – inamın, fədakarlığın və birliyin rəmzi.
İmam Hüseynin (ə.s.) əziz xatirəsinə həsr olunmuş Ərbəin ziyarəti təkcə dini mərasim deyil – bu, milyonlarla insanı birləşdirən mənəvi yürüş, sülh və həmrəylik çağırışıdır.
Hazırda dünyanın dörd bir yanından insanlar Kərbəlaya doğru səfər edir, Ərbəin ziyarəti rəsmi olaraq başlayıb. Milyonlarla zəvvar uzun məsafələri qət edərək, İmam Hüseynin (ə.s.) Kərbəlada yerləşən müqəddəs ziyarətgahını ziyarət etməyə doğru piyada yürüş edirlər.
Zəvvarlar eyni zamanda Kərbəla və Nəcəf şəhərlərində yerləşən müqəddəs ziyarətgahları ziyarət edərək, bu mənəvi baxımdan əhəmiyyətli məkanlarla olan dərin bağlılıqlarını bir daha ifadə edirlər.
Azərbaycan və İraq müsəlmanlarını əsrlərdir birləşdirən Kərbəla ziyarətgahı, İslam dünyasının ortaq yaddaşında xüsusi yer tutur. Bu müqəddəs məkan, dinlərarası və məzhəblərarası dialoqun, qarşılıqlı hörmətin və inanc əsasında qurulan dostluğun möhkəmlənməsində mühüm rol oynayır.
Ərbəin ziyarəti, İslam həmrəyliyinin və Azərbaycan–İraq arasında tarixən formalaşmış qardaşlıq münasibətlərinin mühüm təzahürlərindən biridir.
Bu münasibətlə cari ildə Azərbaycandan İraqa səfər edən bütün həmvətənlərimizə və digər ziyarətçilərə – Uca Allahdan ziyarətlərinin qəbul olunmasını diləyirəm.
