İranın Ali Milli Təhlükəsizlik Şurasının katibi Azərbaycana səfər edəcək

Qafqazagency.ir xəbər verir ki, bu barədə Azərbaycan Respublikasının Prezidenti İlham Əliyevin xarici siyasət məsələləri üzrə köməkçisi Hikmət Hacıyev və İranın Ali Milli Təhlükəsizlik Şurasının katibi Əli Əkbər Əhmədian arasında telefon danışığı zamanı məlum olub.

Məlumatı İranın “Mehr” agentliyi yayıb.

Məlumata görə, telefon danışığı zamanı Tehran-Bakı münasibətlərinin daha da gücləndirilməsi və mövcud razılaşmaların icrasının sürətləndirilməsinin vacibliyi vurğulanıb.

Hikmət Hacıyev İran torpaqlarına edilən hücumu kəskin şəkildə pisləyib və bu hücum nəticəsində şəhid olan iranlı komandir və alimlərə görə başsağlığı verib.

Tərəflər iki ölkə prezidentləri arasında əldə olunmuş razılaşmaların icrasına önəm verilməli olduğunu və qarşılıqlı əlaqələrin daha yüksək səviyyəyə qaldırılması barədə razılığa gəliblər.

Bundan əlavə, Əli Əkbər Əhmədianın yaxın vaxtlarda Azərbaycana planlaşdırılan səfəri çərçivəsində bir sıra məsələlərin, o cümlədən Azərbaycanda təhsil alan iranlı tələbələrin problemlərinin həlli istiqamətində müvafiq addımların atılması barədə də razılıq əldə olunub.