“Əgər Azərbaycan bu xəbərdarlıqdan nəticə çıxarmasa və mümkün tədbirlərini almasa, o zaman rəsmi Bakı ilə danışıqlar başqa müstəvidə davam edə bilər”. bu sözləri rusiyalı politoloq Qriqori Trofimçuk Qərbin Azərbaycana təzyiq cəhdi ilə bağlı Rusiyada da aparılan müzakirələr barədə danışarkən deyib. O, ABŞ-ın Azərbaycana hələlik xəbərdarlıq etdiyini bildirib:
“ABŞ hələlik Azərbaycana xəbərdarlıq edir. Problem ondadır ki, Amerika son on ildə heç kimi elə-belə təhdid etməyib və söz oyunları ilə məşğul olmayıb. Əgər o nəyisə deyirsə, tez və ya gec, öz maraqlarını reallaşdırır”.
Politoloq “Maydan”ın yerli versiyasının bir dəfə Azərbaycanda sınaqdan keçirildiyini söyləyib:
“Azərbaycanda bir dəfə “Maydan”ın yerli versiyasını sınaqdan keçirməyə çalışıblar. Bu, təxminən 2004-2005-ci illərdə olub. O zaman ölkə küçələrində aktivlik artmışdı. Amma elə o vaxtlar Azərbaycan hakimiyyəti bu aksiyaların sonunun hara gedəcəyini başa düşdü və doğru qərarlar verdi.
Bu gün isə vəziyyət dəyişib, artıq Bakı üçün “Maydan” təhlükəsi yoxdur. Rəngli inqilablar dövrü çoxdan arxada qalıb. İndi separatçıların silahlandırılması və hərbi güc vasitəsilə hakimiyyətə təsiri sınaqdan keçirilir və bu, dəhşətli təhlükədir. Xüsusilə bundan seçkilər zamanı istifadə edirlər. Azərbaycanın spesifik şəraitini nəzərə alsaq, o zaman sizdə vəhabizm və digər dini radikal qruplardan istifadə imkanlarını sınaya bilərlər. Bu ciddi təhlükəyə qarşı çox ciddi ölçülər götürülməlidir”.
Qeyd edək ki, bir müddət öncə ABŞ-ın Azərbaycandakı səfiri Morninqstar Azərbaycanda “Maydan”ın qacılmaz olduğunu bildirmişdi. Bu açıqlama ictima-siyasi çevrədə ciddi etiraza səbəb oldu və hətta MDB məkanında da müzakirələrə yol açdı. Azərbaycanın sərhədlərini aşan bu müzakirələrdə ABŞ-ın Qafqazı da qeyri-stabil əraziyə çevirmək ehtimalları səsləndirilir./ Axar.az/
