İndoneziya israilli gimnastların girişinə qadağa qoydu
Qafqazagency.ir xəbər verir ki, İndoneziya hökuməti Qəzzada davam edən müharibə və mülki itkilərə etiraz olaraq israilli gimnastlara ölkəyə daxil olmaq üçün viza verməkdən imtina edib. Bu qərar nəticəsində İsrail yığması bu ay Cakartada keçiriləcək bədii gimnastika üzrə dünya çempionatında iştirak hüququnu itirib.
İndoneziya Gimnastika Federasiyasının rəhbəri İta Culiyati bu barədə jurnalistlərə açıqlamasında deyib: “İsrail idmançılarının gəlməyəcəyi artıq rəsmən təsdiqlənib.”
Hökumət: “Qərar dövlət siyasətinə uyğundur”
İndoneziyanın hüquq məsələləri naziri Yusril İza Mahendra bildirib ki, qərar ölkənin milli mövqeyinə tam uyğundur. Onun sözlərinə görə, bir sıra qurumlar – o cümlədən İndoneziya Ulema Şurası və Cakarta şəhər rəhbərliyi – İsrailin idman nümayəndə heyətinə viza verilməsinə qarşı çıxıblar.
Nazir əlavə edib ki, bu addım İndoneziyanın illərdir davam edən rəsmi siyasətinə əsaslanır: “Biz ‘İsrail’lə diplomatik münasibətləri yalnız o zaman quracağıq ki, o, Fələstin dövlətinin müstəqilliyini və suverenliyini tam şəkildə tanısın.”
Yarışdan kənar qalma İsrəil komandasına baha başa gələcək
İsrail gimnastlarının yarışa buraxılmaması onların dünya reytinqinə və gələcək yarışlara qatılmaq imkanlarına ciddi təsir göstərəcək. Dünya çempionatı 19–25 oktyabr tarixlərində Cakartada keçiriləcək və dünyanın 60-dan çox ölkəsindən yüzlərlə idmançını bir araya gətirəcək.
İndoneziya, dünyanın ən böyük müsəlman əhalisinə malik ölkəsi olaraq, “İsrail”lə diplomatik əlaqələr saxlamır və uzun illərdir Fələstin məsələsində birmənalı şəkildə Fələstin xalqını dəstəkləyir.
Qərar ictimai dəstək qazanıb
Yerli mediada yayılan məlumatlara görə, hökumətin qərarı ölkə ictimaiyyəti tərəfindən geniş dəstəklənib. Sosial şəbəkələrdə çoxsaylı indoneziyalılar hökumətin Qəzzadakı müharibə fonunda “humanist və prinsipial mövqe” sərgilədiyini bildiriblər.
Ekspertlər hesab edirlər ki, bu addım idman diplomatiyasında presedent yarada və digər müsəlman ölkələrinin də oxşar mövqe nümayiş etdirməsinə təkan verə bilər.
