Saxlanılanlar barəsində “azadlıqdan məhrumetmə” və “azadlığın məhdudlaşdırılması” cəzaları təyin olunub
Qafqazagency.ir xəbər verir ki,İmişlidə Dövlət Yol Polisi (DYP) avtomobilinin törətdiyi, 3 uşağın ölümü, daha bir nəfərin yaralanması ilə nəticələnən qəzadan sonra etiraz etdikləri üçün saxlanılanların cinayət işi üzrə məhkəmə prosesi keçirilib.
İyulun 3-də İmişli rayon Məhkəməsində hakim Zaur Pirverdiyevin sədrliyi ilə keçirilən prosesdə saxlanılanlar barəsində “azadlıqdan məhrumetmə” və “azadlığın məhdudlaşdırılması” cəzaları təyin olunub.
İş üzrə təqsirli bilinən Nazim Əliyev 1 il, Taleh Məmmədov 4 il, Ruslan Quliyev 2 il, Kənan Mejdunov 4 il, Rahib Rzayev 4 il müddətinə azadlıqdan məhrum edilib.
Canpolad Əliyevə 1 il, Hüseyn Cabbarlıya 3 il, Elman İbrahimova 1 il, Sənan Əliyevə 1 il 6 ay, Vüqar Usubluya 2 il, Abbas Bağırova 1 il 6 ay, Rahib Tağıyevə 3 il, Elxan Əzimova 1 il 6 ay, Fərid Seyidzadəyə 3 il, Qoşqar Məmmədova 3 il, Eldar Ağazadəyə 1 il, Elnur Babayevə 2 il, Rasif Babayevə 4 il, Şamil Səfərova 2 il azadlığın məhdudlaşdırılması cəzası təyin edilib.
Nazim Əliyevə təyin edilmiş cəza Cinayət Məcəlləsinin 70-ci maddəsi tətbiq edilməklə şərti hesab olunub.
İmişlidə nə baş verib?
2025-ci il yanvarın 18-də Dövlət Yol Polisinin (DYP) iştirakı ilə İmişlidə ölümlə nəticələnən yol nəqliyyat hadisəsi olub.
Polisin yüksək sürətlə idarə etdiyi xidməti avtomobil məktəbdən gələn 4 şagirdi vurub, onlardan ikisi hadisə yerində keçinib. Digər iki nəfər isə xəstəxanaya yerləşdirilib.
DYP avtomobilinin sürücüsü də xəsarət alıb.
Qəzada xəsarət alan azyaşlılardan daha biri isə yanvarın 22-də xəstəxanada vəfat edib.
Hadisə baş verən gün DİN qəzanın görüntülərini yayıb.
Videoda digər, “Mersedes-Benz 190” markalı avtomobilin polis maşınının önünə çıxdığı görünüb, amma görüntü dəfələrlə yavaşıdıldığı üçün polis avtomobilinin hansı sürətlə hərəkət etdiyi məlum olmayıb.
DYP avtomobilinin yüksək sürətlə hərəkət etməsi və həlak olanların azyaşlı olması yerli əhalidə qəzəb doğurub və elə həmin gün insanlar küçələrə axışıb.
Qəzəblənmiş kütlə, xüsusilə gənclər polis avtomobilini arxası üstə aşırıblar, yüzlərlə adam “istefa” şüarı səsləndirərək İmişli Rayon Polis İdarəsinin önünə doğru yürüş ediblər.
Ardınca Daxili İşlər Nazirliyi (DİN) məlumat yayaraq etiraz edənlərin “xuliqanlıq” ittihamı ilə həbs olunduğunu bildirib.
Sosial şəbəkələrdə bildirilib ki, polis avtomobilinə hücum edən, onu çevirən və polislərlə mübahisə edən 100-dən çox adam saxlanılıb.
Saxlanılanların əksəriyyəti İnzibati Xətalar Məcəlləsinin 510-cu (xırda xuliqanlıq) və 535.1 (polisin qanuni tələbinə tabe olmama) maddələri ilə təqsirləndirilərək barələrində 1 ayadək inzibati həbs verilib.
Baş verən hadisələrdən sonra İmişli şəhərində gücləndirilmiş rejim hökm sürüb. İnzibati binaların, parkların, meydanların ətrafında polislər qarovul çəkib.
Sosial şəbəkələrdə yayılan məlumatlarda hətta şəhərə Daxili Qoşunların yeridildiyi və yolların bağlandığı bildirilib.
Yerli əhalidən verilən məlumata əsasən, həmin vaxt İmişlidə interneti də kəsiblər.
Yanvarın 22-də İmişli Rayon Məhkəməsi yol qəzasından sonrakı etirazlarda xuliqanlıq hərəkətlərinə görə saxlanılankar barəsində 3 ay müddətinə həbs qətimkan tədbiri seçib.
Saxlanılan şəxslərə Cinayət Məcəlləsinin 221.2.1. (Xuliqanlıq – bir qrup şəxs tərəfindən törədildikdə) maddəsi üzrə ittiham verilib.
DYP-yə məxsus avtomobili sürən və qəza törədən polisin isə məsuliyyətə cəlb olunub-olunmaması barədə rəsmi heç bir məlumat verilməyib.
Sosial şəbəkələrdə iddia olunub ki, həmin şəxs keçmiş deputat, milyonçu Əhəd Əhmədovun qardaşı oğludur.
