Aliməqamlı Rəhbər vurğulayıb: Namaz Qurultayı ölkənin ən faydalı toplantılarından biridir və bu qurultayın keçirildiyi gün ilin ən mübarək günlərindən sayılır. Bu da, İslamın bütün vacibatları içərisində bu mənalı və həyatbəxş ibadətin ucalığı və əzəmətinə görədir.
Həzrət Ayətullah Xamenei 32-ci Ümummilli Namaz Qurultayına ünvanladığı mesajında insanın dünya və axirət taleyində namazın dərin və həyatverici roluna işarə edərək vurğulayıb: Namazın təbliği və təlimi, onun batini incəliklərinin açıqlanması və ona əməl olunması – din təbliği ilə məşğul olan qurumların, din xadimlərinin və mömin insanların mütləq vəzifəsidir. Bu istiqamətdə müasir vasitələrdən istifadə olunmalıdır.
Rəhbərin mesajının mətni:
Bismillahir-rəhmanir-rəhim
və səlləllahu əla Muhəmmədin və alihit-tahirin
Namaz Qurultayı ölkənin ən faydalı toplantılarından biridir və bu qurultayın keçirildiyi gün ilin ən mübarək günlərindən sayılır. Bu, İslam vacibatları arasında bu mənalı və həyatbəxş ibadətin ucalığı və əhəmiyyətinə görədir.
Namaz öz ədəb-ərkanına – yəni xüşu və qəlbini tam şəkildə Məbuda yönəltməklə qılındıqda, qəlbə aramlıq verir, iradəni möhkəmləndirir, imanı dərinləşdirir və ümidə həyat bəxş edir. İnsanın həm dünya, həm də axirət taleyi məhz belə bir qəlb, belə bir iradə, belə bir iman və belə bir ümiddən asılıdır.
Buna görədir ki, Quranda və digər dini mətnlərdə namaza tövsiyə digər bütün tövsiyələrdən daha çoxdur və buna görədir ki, azanda “namaz bütün işlərdən daha yaxşıdır” deyilir. Ata və analar, müəllimlər və dostlar, eləcə də namazla bağlı həyat qaydaları və adətləri – hamısı bu ibadətin yayılmasında və ona riayət olunmasında rol oynayır.
Din təbliği ilə məşğul olan qurumlar, din xadimləri və bütün möminlər bu məsələni qəti vəzifələri saymalı və namazın tədrisi, yayılması, onun dərin mənalarının açıqlanması və hər bir müsəlmanın dünya və axirət ehtiyacının namazla bağlı olduğunu izah etmək üçün müasir və təşviqedici vasitələrdən istifadə etməlidirlər.
Bu bərəkətli və səmərəli ağacı əkib bu mərhələyə qədər çatdıran hörmətli cənab Qəraətidən səmimi qəlbdən təşəkkür edirəm.
Vəssəlamu ələykum və rəhmətullah
Seyyid Əli Xamenei
15 Mehr 1404 (7 Oktyabr 2025)
