Qafqazagency.ir xəbər verir ki, İran İslam İnqilabının Ali Rəhbəri İmam Xamenei, 12 günlük müharibənin şəhidlərinin qırx mərasimi münasibətilə keçirilən tədbirdə çıxış edərək bildirdi ki, qlobal istikbarın, başda cinayətkar Amerika olmaqla, İran İslam Respublikasına qarşı əsas düşmənçiliyinin səbəbi xalqın dinə və elmə bağlılığı, vəhdəti və Quranın kölgəsi altında birliyi ilə bağlıdır.
Ali Rəhbərin iştirakı ilə bu gün – çərşənbə günü – İmam Xomeyni (r.ə) Hüseyniyəsində, 12 günlük sionist rejimin İrana qarşı zorakı müharibəsində şəhid olanların qırx mərasimi keçirildi. Tədbirdə şəhid ailələri, xalqın müxtəlif təbəqələri və dövlət rəsmiləri iştirak edirdi.
İmam Xamenei bu tədbirdəki çıxışında bildirdi ki, bu müharibə İran İslam Respublikasının iradə və gücünün təcəllisi oldu və sistemin misilsiz sabitliyini nümayiş etdirdi. O qeyd etdi: “Düşmənlərin əsas düşmənçiliyi xalqımızın imanı, elmi və birliyinə qarşıdır. Biz Allahın izni ilə iman və müxtəlif elmləri inkişaf etdirmək yolunu tərk etməyəcəyik və düşmənin gözləri qarşısında İranı yüksəliş və şərəfə çatdıracağıq.”
Ali Rəhbər şəhid olan hərbi komandirlər, alimlər və xalq üçün yenidən başsağlığı verərək əlavə etdi: “İran xalqı bu 12 gündə böyük şərəf qazandı və bu, dünya tərəfindən etiraf olunur. Xalqımız öz gücünü, dözümünü və əzmini nümayiş etdirdi və dünya İran İslam Respublikasının gücünü birbaşa hiss etdi.”
O, bu son müharibədə İranın sabit və möhkəm əsaslara söykənən sistemini nümayiş etdirdiyini bildirərək əlavə etdi: “Bu hadisələr bizim üçün yeni deyil. 46 illik tarixi boyunca İslam Respublikası müxtəlif çevrilişlər, fitnələr, hərbi və siyasi təhdidlər və xalqı qorxutmağa yönəlmiş planlarla üzləşib və bütün bu düşmənçiliklərə qarşı müqavimət göstərərək onları boşa çıxarıb.”
İmam Xamenei İran İslam Respublikasının iki əsas sütun – “din” və “elm” üzərində qurulduğunu vurğuladı və dedi: “İran xalqı bu iki dayağa arxalanaraq müxtəlif sahələrdə düşməni geri çəkilməyə məcbur edib və bundan sonra da bu yolla davam edəcək.”
O, Qərbin, xüsusilə də Amerikanın İslam Respublikasına qarşı düşmənçiliyinin əsas səbəbinin İran xalqının Quran və İslam çərçivəsindəki birlik və elmi bacarıqları olduğunu deyərək əlavə etdi: “Onların nüvə, uranın zənginləşdirilməsi və insan haqları adı ilə səsləndirdiyi iddialar sadəcə bəhanədir. Onları narahat edən məsələ İran İslam Respublikasının elmi, texniki və dini sahələrdəki bacarıqları və yeni fikirlər irəli sürməsidir.”
İmam Xamenei əlavə etdi: “İran xalqı Allahın köməyi ilə nə dinindən, nə də elmindən əl çəkəcək. Biz dinimizi möhkəmləndirmək və elmi biliklərimizi genişləndirmək yolunda böyük addımlar atacağıq və düşmənin gözləri qarşısında İranı yüksəlişə çatdıracağıq.”
Tədbirdə bir neçə Quran qarisi Qurani-Kərimin ayələrindən tilavət etdi. Həmçinin Höccətülislam Rəfii çıxışında Nəhcül Bəlağənin 182-ci xütbəsinə istinad edərək Siffeyn müharibəsi şəhidlərinin xüsusiyyətlərini xatırlatdı və bu xüsusiyyətlərin 12 günlük müharibə şəhidlərinə də aid olduğunu bildirdi.
O, aşağıdakı səkkiz xüsusiyyəti qeyd etdi: haqq yolda sabit qalmaq, Quran tilavəti və ona əməl etmək, vacibatı yerinə yetirmək, ilahi sünnələri diriltmək, bidətlərə qarşı çıxmaq, cihadda iştirak və rəhbərliyə itaət. O əlavə etdi ki, Quranın açıq ifadəsinə görə, iman və təvəkkül Allahın yardımının əsas səbəbləridir və bu iki amil 12 günlük müharibədə İran xalqının müqavimət və qələbəsində açıq şəkildə özünü göstərdi.
Sonda, cənab Məhəmmədrza Bəzri sionist düşmənə qarşı müharibədə şəhidlərin qəhrəmanlığını tərənnüm edən şeirlər oxudu və Alullah (ə) ailəsinin müsibətlərinə dair mərsiyə söylədi.
