İmam Əli (ə) Ziyarətgahında Məhərrəm ayına hazırlıq – FOTO

Qafqazagency.ir xəbər verir ki, Nəcəfül-Əşrəf şəhərində yerləşən İmam Əli (ə) ziyarətgahında Məhərrəm ayının gəlişi münasibətilə matəm hazırlıqlarına start verilib. Ziyarətgahın məsul şəxsləri və xidmətçiləri hər il olduğu kimi bu il də ziyarətgahın daxilini və xarici hissəsini qara matəm parçaları ilə bəzəyərək Aşura əzadarlığına hazırlaşırlar.

Hazırlıqlar çərçivəsində “Ya Hüseyn (ə)”, “Ləbbəyk ya Hüseyn” kimi əzadarlıq şüarları və İmam Hüseynin (ə) adını əks etdirən bayraqlar quraşdırılır. Ziyarətgahda olan zəvvarlar bu mənzərə qarşısında dərin hüzn və hörmətlə ziyarətlərini davam etdirirlər.

İmam Əli (ə) ziyarətgahı hər il Məhərrəm ayında yüz minlərlə zəvvarı qəbul edir. Əzadarlıq mərasimləri Kərbəla hadisəsinin canlı şəkildə yad olunması ilə yanaşı, İmam Hüseynin (ə) ədalət, haqq və şəhadət yolundakı mübarizəsinin əks-sədasıdır.

Hazırlıqların ilk mərhələsi artıq yekunlaşmaq üzrədir və qarşıdakı günlərdə Məhərrəm mərasimlərinin rəsmi olaraq başlanacağı gözlənilir.