İranda Çabahardakı terror aktı ilə əlaqəli 10 nəfər həbs olundu

İran İslam Respublikasının hüquq-mühafizə qüvvələrinin komandanı İranın cənub-şərqində yerləşən Çabahar şəhərində edilmiş terror hücumu ilə bağlı on nəfərin həbs olunması haqda açıqlama verib.

qafqaz.ir .Briqada generalı pasdar Hüseyn Əştəri bu gün jurnalistlərə açıqlamasında deyib: “Çabahar hüquq-mühafizə qüvvələri məmurlarının sayıqlığı və şücaəti ilə bu terror fitnəsi zərərsizləşdirildi və bu hücumla bağlı bir qrup şəxs həbs edildi.”

General Əştəri sözlərinin davamında bildirib ki, Çabahar terror hücumu ilə bağlı bir qrup şəxs də aşkar edilib və onlar təyin edilmiş zamanda həbs olunacaqlar. 

Xatırladaq ki, kamikadze terrorçu cümə axşamı günü içində partlayıcı maddələr olan bir avtomobil ilə İranın cənub-şərqində yerləşən Sistan və Bəluçistan vilayətindəki Çabaharın polis qərargahına hücum etmək niyyətində olub. Amma hüquq-mühafizə qüvvələrinin müqaviməti ilə üzləşən bu terrorçu içində partlayıcı maddələr olan avtomobili  hüquq-mühafizə qüvvələri qərargahının girəcəyində partladıb.

Bu terror hücumunda iki nəfər dünyasını itirib, 42 nəfər, o sıradan bir neçə qadın və uşaq da yaralanıb. Terrorçu da hücum zamanı ölüb.