Siyahıya yeni həbs olunan 21 nəfərin adları daxil edilib
“Azərbaycan Siyasi Məhbuslarına Azadlıq” Birliyi ölkədə siyasi məhbusların yeni siyahısını açıqlayıb. Siyahıya 375 nəfərin adı daxil edilib.
Bu, birliyin 2025-ci il fevralın 12-də təqdim etdiyi siyahı ilə müqayisədə 21 nəfər çoxdur. Bundan öncəki siyahıda 357 nəfərin adı var idi.
Yeni siyahıya jurnalist Ülviyyə Əli, ictimai fəal Əhməd Məmmədli, vətəndaş cəmiyyətinin üzvləri Bəşir Süleymanlı, Məmməd Alpay, dindarlar, AXCP üzvləri və son həbs olunan digər siyasi və ictimai fəalların adları əlavə edilib.
Yeni siyasi məhbus siyahısını Sülh və Demokratiya İnstitutunun direktoru Leyla Yunus və Siyasi Məhbusların Monitorinq Mərkəzinin rəhbəri Elşən Həsənov hazırlayıblar.
Siyahı 12 qrupa bölünüb:
jurnalistlər və blogerlər – 29 nəfər;
hüquq müdafiəçiləri – 6 nəfər;
müxalifət partiyalarının və vətəndaş cəmiyyətinin üzvləri – 39 nəfər;
milli azlıqların fəalları – 5 nəfər;
müharibə əleyhinə fəallar – 2 nəfər
“Söyüdlü kəndinin işi” üzrə – 2 nəfər;
Almaniyadan deportasiya edilmiş siyasi mühacirlər – 5 nəfər;
dindarlar – 241 nəfər;
“Tərtər işi” üzrə məhkumlar – 8 nəfər;
“Gəncə işi” üzrə məhkumlar – 13 nəfər;
ömürlük həbs cəzası alanlar – 12 nəfər;
“İmişli işi” üzrə həbs olunanlar – 13 nəfər.
Müəlliflər bildiriblər ki, siyahı Avropa Şurası Parlament Assambleyasının (AŞPA) 2012-ci ilin oktyabrında keçirilən sessiyasında qəbul edilmiş 1900 nömrəli müvafiq qətnamədə müəyyən edilmiş “siyasi məhbus” anlayışının müəyyənləşdirilməsi meyarlarına əsasən tərtib edilib.
Azərbaycan hakimiyyəti ölkədə siyasi məhbus olduğunu birmənalı şəkildə rədd edir, heç kimin fərqli düşüncəsinə, siyasi mövqeyinə görə həbs olunmadığını, onların konkret cinayət əməlinə görə həbs olunduğunu bildirirlər.
