Onun baş nahiyəsindən xəsarət aldığı deyilir
Qafqazagency.ir xəbər verir ki, Hazırda həbsdə olan İkinci Qarabağ müharibəsi iştirakçısı, artıq fəaliyyətini dayandırmış “Gənc Qazilər” İctimai Birliyinin (İB) sədri Hacı Vəliyevin həbsdə işgəncəyə məruz qaldığı bildirilir.
Bu barədə məlumatı yaxınları verib.
Onların sözlərinə görə, Hacı Vəliyev ailəsi ilə telefon əlaqəsi zamanı baş nahiyəsindən xəsarət aldığını bildirib. Bu səbəbdən onun danışmaqda çətinlik çəkdiyi qeyd edilib.
Yaxınları onun vəziyyətindən narahatdır.
Penitensiar Xidmət və aidiyyatı qurumlar deyilənlərə münasibət bildirməyiblər.
Hacı Vəliyev İkinci Qarabağ Müharibəsindən sonrakı dövrdə döyüşlərdə sağlamlığını itirmiş hərbçilərin və şəhid ailələrinin problemlərini ictimailəşdirirdi.
O, 2025-ci il martın 18-də küçə ticarətilə məşğul olan qazilərin polis müdaxiləsinə məruz qalması ilə bağlı videomaterial yaymışdı.
Martın 31-də polis əməkdaşları onu saxlayıb.
Hacı Vəliyev Cinayət Məcəlləsinin 221.3-cü (xuliqanlıq, silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunduqda) və 186.1-ci (özgənin əmlakını qəsdən məhv etmə və ya zədələmə zərərçəkmiş şəxsə xeyli miqdarda ziyan vurmaqla törədildikdə) maddələri ilə ittiham olunub.
Hacı Vəliyev ona qarşı irəli sürülən ittihamları qəbul etmir.
“Gənc Qazilər” İctimai Birliyi 2021-ci ildə “Qarabağ qaziləri” İctimai Birliyinin nəzdində yaradılmışdı. Bu il mayın 28-də isə təşkilat fəaliyyətini dayandırıb.
