Qafqazagency.ir xəbər verir ki, Həzrət Ayətullah İmam Xamenei sionist rejimlə baş vermiş məcburi müharibədə İranın şəhid olmuş generallarının şəhadətinin qırxıncı günü münasibətilə buyurub: Elmi və texnoloji sahələrin bütün bölmələrində irəliləyişin sürətləndirilməsi elmi cəhətdən seçilmiş olan alimlərin məsuliyyət dairəsindədir. Ölkə və millətin izzət və abırını qorumaq tribun və qələm sahiblərinin qeydsiz-şərtsiz vəzifəsidir. Ölkənin milli təhlükəsizlik və müstəqilliyini qoruyan vasitələrlə daim təchiz olunması hərbi komandanların vəzifəsidir. İşlərin ciddi və ardıcıl şəkildə aparılması və nəticəyə çatdırılması icraedici qurumların məsuliyyətidir. Xalqın qəlbini mənəvi olaraq nurlandırmaq, səbir, asayiş və sabitliyə təşviq etmək isə hörmətli ruhanilərin vəzifəsidir. İnqilabi coşqu, şövq və şüurun qorunması isə hər birimizin, xüsusilə də gənclərin vəzifəsidir.
İnqilab rəhbərinin müraciətinin mətni belədir:
Bağışlayan və mehriban Allahın adı ilə
İranın başıuca xalqı! Əziz həmvətənlərimizdən bir qrupunun, aralarında bacarıqlı hərbi komandanlar və nüfuzlu nüvə alimləri olan şəhidlərimizin şəhadətinin qırxıncı günü gəlib çatdı. Bu ağır zərbəni İran xalqının alçaq və inadkar düşməni olan xəbis və cinayətkar sionist hakim qrupu endirdi. Şəhid Baqiri, Salami, Rəşid, Hacızadə, Şadmani və digər hərbçilər, eləcə də şəhid Tehrançı, Abbasi və digər alimlərin itkisi hər bir xalq üçün ağırdır. Lakin axmaq və dardüşüncəli düşmən hədəfinə çata bilmədi. Gələcək göstərəcək ki, həm hərbi, həm də elmi hərəkət daha böyük sürətlə yüksək üfüqlərə doğru irəliləyəcək, inşallah.
Şəhidlərimiz elə bir yolu seçmişdilər ki, bu yolda şəhidlik zirvəsinə yetişmək ehtimalı az deyildi və nəhayət, bütün fədakarların arzu etdiklərinə çatdılar. Bu səadət onlara mübarək olsun. Lakin bu itkinin acısı İran xalqı, xüsusilə də şəhidlərin ailələri və onları yaxından tanıyanlar üçün çətin, acı və ağırdır.
Bu hadisədə aydın şəkildə görünən parlaq məqamlar da vardır. Birincisi, şəhid ailələrinin səbir, dözüm və ruh yüksəkliyidir. Bu, yalnız İran İslam Respublikasında baş verən hadisələrdə müşahidə olunmuşdur. İkincisi, şəhidlərin tabeliyində olan qurumların müqaviməti və sabitliyidir və bu da bu ağır zərbənin fürsətləri puç etməsinə və onların hərəkətinə fasilə verməsinə imkan vermədi. Üçüncüsü isə, İran xalqının möcüzəvi və möhtəşəm dözümüdür. Onların birliyi, ruhi möhkəmliyi və qətiyyətli iradəsi meydanda vahid şəkildə özünü göstərdi. İslam Respublikası olan İran bu hadisədə bir daha öz möhkəm təməlini sübut etdi. İranın düşmənləri hədərə çalışırlar.
İslam Respublikası olan İran Allahın izni ilə gündən-günə daha da güclənəcək, inşallah.
Əsas məsələ budur ki, biz bu həqiqətdən və onun bizim boynumuza qoyduğu vəzifədən qafil olmayaq. Milli birliyin qorunması hər birimizin vəzifəsidir. Elmi və texnoloji sahələrin bütün bölmələrində irəliləyişin sürətləndirilməsi elmi cəhətdən seçilmiş olan alimlərin məsuliyyət dairəsindədir. Ölkə və millətin izzət və abırını qorumaq tribun və qələm sahiblərinin qeydsiz-şərtsiz vəzifəsidir. Ölkənin milli təhlükəsizlik və müstəqilliyini qoruyan vasitələrlə daim təchiz olunması hərbi komandanların vəzifəsidir. İşlərin ciddi və ardıcıl şəkildə aparılması və nəticəyə çatdırılması icraedici qurumların məsuliyyətidir. Xalqın qəlbini mənəvi olaraq nurlandırmaq, səbir, asayiş və sabitliyə təşviq etmək isə hörmətli ruhanilərin vəzifəsidir. İnqilabi coşqu, şövq və şüurun qorunması isə hər birimizin, xüsusilə də gənclərin vəzifəsidir.
Rəhmli və yenilməz Allah hamını müvəffəq etsin.
Salam olsun İran xalqına. Salam olsun gənc şəhidlərə, şəhid qadınlara və uşaqlara və bütün şəhidlərə və onların yas içində olan ailələrinə.
Allahın salam və rəhməti olsun sizə.
Seyid Əli Xamenei
25.07.2025
