1 saylı cəzaçəkmə müəssisəsində cəza çəkən İsmayılzadə Yavər Azər oğlu ölkədə insan hüquqlarının pozulmasına, xüsusilə də inanclı xanımların həbslərinə etiraz edib. Bu barədə o, sentyabrın 21-də ailəsi ilə telefon danışığı zamanı məlumat verib.
Qafqazagency.ir xəbər verir ki,Yavər ölkədə geniş vüsət alan insan hüquqları pozuntularını, xüsusilə inanclı xanımların həbslərini pisləyərək bu addımları yolverilməz hesab etdiyini bildirib və məsələyə etiraz olaraq sentyabrın 22-dən aclıq aksiyasına başladığını deyib. O, həmçinin bu mövzuda rəsmi məktub hazırladığını və müəssisə rəhbərliyinə təqdim edəcəyini qeyd edib. Y. İsmayılzadə ərizəsində Azərbaycan vətəndaşlığından imtina etdiyini də vurğulayaraq, mövcud vəziyyətin bütün həddləri aşdığını diqqətə çatdırıb.
Ailəsinin sözlərinə görə, Yavər sentyabrın 21-dən sonra əlaqə saxlamayıb. Bu isə onun aclıq aksiyasına görə karserə salınması ehtimalını gücləndirir.
Xatırladaq ki, avqustun 14-də bir qrup inanclı xanım İmam Hüseynin (ə) 40 mərasimi günü Xəzər rayonu ərazisində ehsan paylamağa çalışıb. Polis onların saxlanıldığını və altı nəfər barəsində cinayət işi açıldığını açıqlayıb. Polis xanımların bu addımını “dini mərasim keçirilməsi nəzərdə tutulmayan yerdə tədbir keçirmə cəhdi” kimi dəyərləndirib.
