Polad Aslanovun həyat yoldaşı: “Məsələdən 15 saylı Cəzaçəkmə Müəssisəsinin rəisi Rəşad Əhədovun xəbəri var”
Qafqazagency.ir xəbər verir ki, “Xeberman.com” saytının həbsdə olan rəhbəri Polad Aslanovun saxlanıldığı 15 saylı cəzaçəkmə müəssisəsində təxribata məruz qaldığı bildirilir.
Həyat yoldaşı Gülmirə Aslanovanın Meydan TV-yə verdiyi məlumata görə, Polad Aslanovun istintaqı və məhkəməsi zamanı ona qarşı ifadə vermiş məhbus Fərhad Quliyev indi də həbsxanada onu manipulyasiya etməyə çalışır:
“Fərhad Quliyev həbsxanada şayiə yayıb ki, guya Polad hakimiyyətin adamıdır, hakimiyyətə işləyir. Məhkəmədə isə deyirdi ki, Polad İrana casusluq edir. Məsələdən 15 saylı Cəzaçəkmə Müəssisəsinin rəisi Rəşad Əhədovun xəbəri var. Müəssisə rəhbəri məqsədli şəkildə Fərhad Quliyevin əli ilə Poladı təxribata çəkərək qarışıqlıq və ya münaqişə yaratmağa çalışır ki, nəticədə onu ciddi rejimli cəzaçəkmə müəssisəsinə köçürsün”.
Gülmirə Aslanovanın sözlərinə görə, hazırda digər məhbuslardan təcrid edilən Polad Aslanovun psixoloji durumu yaxşı deyil.
“Fərhad Quliyev içəridə elə bir vəziyyət yaradıb ki, məhbuslar Poladdan uzaqlaşıblar. Heç kim ona yaxın durmur. Polad da bu vəziyyətdən son dərəcə gərgindir. Mayın 29-da telefon danışığımız zamanı Polad mənə dedi ki, artıq həmin adama əl qaldırmaq həddinə çatıb, özünü güclə saxlayır”, – Polad Aslanovun həyat yoldaşı deyib.
Onun sözlərinə görə, bu ay (may) ədliyyə naziri Fərid Əhmədov 15 saylı Cəzaçəkmə Müəssisəsinə gələndə Polad Aslanov həbsxana rəisinin göstərişi ilə 5 saat cərimə kamerasında (karserdə) saxlanılıb:
“Rəis belə edib ki, nazir məhkumların gündəlik vaxt keçirdiyi açıq sahədə gəzəndə, Polad ona yaxınlaşıb, müəssisədəki özbaşınalıqlar, həmçinin şərait – hamam problemi, su çatışmazlığı, saxlanma şərtləri və antisanitariya ilə bağlı vəziyyətlə bağlı məlumat verməsin. Bu, əlbəttə ki, müəssisənin rəisi Rəşad Əhədov üçün problem yarada bilərdi”.
Gülmirə Aslanova deyir ki, Polad Aslanovun həbsxanada təxribatla üz-üzə qalması ilə əlaqədar Ədliyyə Nazirliyinə, Penitensiar Xidmətə və Ombudsmana müraciət etsə də, heç bir cavab almayıb.
Polad Aslanovun vəkili Elçin Sadıqov Meydan TV-yə bildirib ki, konflktləri və işləri eyni olan şəxslərin bir cəzaçəkmə müəssisəsində saxlanılması qanunsuzdur. Vəkil bunun qarşısının alınması məqsədilə Penitensiar Xidmətə müraciət edəcəyini deyib.
Ombudsman Aparatından Meydan TV-yə məsələnin araşdırılacağı və əlavə məlumat veriləcəyi bildirilib.
Penitensiar Xidmətin mətbuat xidməti Meydan TV-nin zənglərini və sorğusunu cavablandırmayıb.
Polad Aslanov 2019-cu il iyunun 12-də həbs olunub.
13 il azadlıqdan məhrum edilən sayt rəhbəri Cinayət Məcəlləsinin 274-cü maddəsilə – dövlətə xəyanətdə təqsirli bilinib.
Sayt rəhbəri ittihamları qəbul etmir və özünü təqsirli bilmir.
O, tənqidçi jurnalist fəaliyyətinə görə cəzalandırıldığını deyib.
