Bakı İstintaq Təcridxanasında saxlanılan dini inanclı şəxs Nigar Bağırovanın vəziyyətinin pisləşdiyi deyilir.
Qafqazagency.ir xəbər verir ki, Bu barədə Meydan TV-yə hüquq müdafiəçisi Arzu Abdulla məlumat verib.
O bildirib ki, Bağırova 33 gündür ki, aclıq aksiyasını davam etdirir və bu müddətdə qoluna venadaxili sistem qoşulub. Lakin bir neçə gün əvvəl Nigar Bağırova venadaxili sistem qəbulunu dayandırıb, bundan sonra quru aclığa başlayacağını bildirib.
“Dünən onun halı pisləşib, yıxılıb başı əzilib. Burnu qanamağa başlayıb”, – deyə Arzu Abdulla qeyd edib.
Arzu Abdulla deyir ki, Nigar Bağırovanın vəziyyəti ağır olaraq qalır. Buna baxmayaraq Bağırova aclıq aksiyasını dayandırmayacağını deyib.
Nigar Bağırova noyabrın 9-da həbsinin daha 2 ay uzadılmasına etiraz olaraq aclıq aksiyasına başlayıb.
Nigar Bağırova avqustun 17-də saxlanılan 6 dini inanclı qadından biridir.
Həmin gün sosial şəbəkələrdə Xəzər rayonu ərazisində ehsan paylayan 6 dini inanclı qadının polis tərəfindən zorakılığa məruz qaldığına dair görüntülər yayılmışdı. Daha sonra Daxili işlər Nazirliyi 38 yaşlı Nigar Bağırova, 41 yaşlı Aytən İbrahimova, 44 yaşlı Şəhla Fərəcova, 50 yaşlı Xoşqədəm Quliyeva, 31 yaşlı Şərqiyyə Sadıqova və 52 yaşlı Arzu Hüseynova saxlanıldığına dair məlumat yaydı.
Onlar dini ayinlər və mərasimlər adı altında aksiyalar keçirməkdə təqsirləndirilirlər.
Məhkəmənin qərarı ilə həmin şəxslər barəsində həbs qətimkan tədbiri seçilib.
