Rusiyanın Federal Təhlükəsizlik Xidməti (FSB) Azərbaycan vətəndaşını Yesentuki və Stavropolda teraktlar hazırlamaqda ittiham edir.
Qafqazagency.ir xəbər verir ki, TASS dövlət xəbər agentliyi həmin vətəndaşa terakt hazırlamaq şübhəsi ilə ittiham irəli sürüldüyünü yazır.
FSB bildirir ki, saxlanılan şəxs Rusiyada qadağan olunmuş Ukrayna terror təşkilatına girib, daha sonra “təşkilatın rəhbərlərinin tapşırığı ilə Yessentukidə və Stavropolda bir sıra obyektlər – xüsusilə də hüquq-mühafizə orqanlarının inzibati binaları və nəqliyyat infrastrukturu barədə kəşfiyyat məlumatı yığıb”.
Həmin şəxsin gərəkən əldəqayırma partlayıcı qurğuların hazırlanması üçün komponentlər əldə etdiyi, onları gizlətdiyi, teraktlar üçün bir neçə partlayıcı qurğu hazırlamağı planlaşdırdığı iddia olunur.
FSB saxlanılan şəxsin Azərbaycan silahlı qüvvələrinin xüsusi bölmələrində xidmət keçdiyini, teraktın hazırlanmasında öz bilik və bacarıqlarından istifadə etmək niyyətində olduğunu bildirir.
Rusiyanın Ryazan vilayət məhkəməsi 55 yaşlı Rusiya vətəndaşının 5 il müddətinə həbsinə dair qərar çıxarıb.
Əslən Azərbaycandan olan qadın Ukrayna Baş Kəşfiyyat İdarəsi ilə əməkdaşlıqda ittiham edilib, cəzasını ümumi rejimli cəzaçəkmə müəssisəsində çəkəcək.
Rusiyanın Federal Təhlükəsizlik Xidməti (FSB) bildirir ki, o, Ryazanda mobil tətbiqlər vasitəsilə Ukrayna xüsusi xidmətlərinin təmsilçisi ilə əlaqə yaradıb, Rusiyanın təhlükəsizliyinə qarşı istifadə oluna biləcək kəşfiyyat məlumatları əldə etməyə çalışıb.
Ukrayna tərəfi guya qadından neft zavodunda yanğından sonra Novo‑Ryazan istilik elektrik stansiyasının (İES) durumunu soruşub. Onun yaşadığı bağ evindən İES-ə gedərək orada hərbi maşının şəklini çəkdiyi, fotonu SBU agentinə göndərdiyi iddia olunur. FSB bu qanunsuz fəaliyyətin dayandırıldığını bildirir.
Bu ittihamlara qarşı tərəfin münasibəti bəlli deyil.
FSB Dağıstanda saxlanan şəxsin milliyətini açıqlamamışdı. Budəfəki xəbərdə isə Ryazanda məhkum edilən Rusiya vətəndaşının azərbaycanlı olduğu göstərilib.
Bütün bunlar son aylar Azərbaycan-Rusiya münasibətlərinin kəskinləşməsi fonunda baş verir.
İyunun sonunda Yekaterinburqda azərbaycanlılara qarşı zorakı reydlərdən sonra Bakıda da bir qrup rusiyalı saxlanılıb.
