Qafqazagency.ir xəbər verir ki, İspaniya hökumətinin sədri Pedro Sançes beynəlxalq ictimaiyyəti Qəzza sektorunda baş verənləri dayandırmaq üçün dərhal hərəkətə keçməyə çağırıb.
O, bu bəyanatı BMT Baş Assambleyasının 80-ci sessiyasının yüksək səviyyəli həftəsi çərçivəsində keçirilən tədbirdə səsləndirib.
İspaniya hökumətinin mətbuat xidmətinin yaydığı məlumata görə, Sançes Fələstinin ən qısa zamanda BMT-nin tamhüquqlu üzvünə çevrilməsinin vacibliyini vurğulayıb. Baş nazir Qəzzadakı vəziyyəti “barbarlıq” adlandıraraq, bunun dərhal dayandırılması üçün tədbirlərin görülməsini tələb edib.
Məlumata əsasən, Madrid Qəzza ilə bağlı İsrailə qarşı kifayət qədər sərt mövqe tutur. Sentyabrın 8-də Sançes Qəzzada “soyqırımı dayandırmaq” məqsədilə bir sıra addımlar atıldığını açıqlayıb. O cümlədən, insan haqlarının pozulması və hərbi cinayətlərdə birbaşa iştirak edən şəxslərin İspaniya ərazisinə daxil olmasına qadağa qoyulub.
