Qafqazagency.ir xəbər verir ki,Xarici işlər naziri bu gün (10 avqust) Nazirlər Kabinetinin iclasının çərçivəsində jurnalistlərə açıqlamasında bildirib ki, növbəti danışıqlar raundu hələ müəyyən olunmayıb və indiyədək heç bir qərar qəbul edilməyib. Onun sözlərinə görə, dolayı danışıqlar da hələ qəti deyil və bu barədə heç bir ölkənin adını təsdiqləmir.
Seyid Abbas Əraqçi, Beynəlxalq Atom Enerjisi Agentliyinin baş direktorunun müavininin Tehrana səfərinə toxunaraq deyib: Sabah Agentliklə yeni əməkdaşlıq çərçivəsinə dair danışıqlarımız olacaq. Daha əvvəl də bildirmişdim ki, Qrossinin müavini sabah Tehrana gələcək. Hazırda əlavə yoxlama proqramı mövcud deyil. Biz hələ yeni çərçivə barədə razılığa gəlməmişik və bu razılıq əldə olunmadan əməkdaşlıq başlamayacaq. Yeni çərçivə mütləq İran İslam Məclisinin qanunlarına əsaslanacaq.
Əraqçi Ermənistan və Azərbaycanla bağlı suala cavabında deyib: Biz bu ölkələrlə dəfələrlə müzakirələr aparmışıq. Sabah Ermənistan xarici işlər naziri mənə zəng edəcək. Ermənistanın baş naziri Nikol Paşinyan da telefonla əlaqə saxlayacaq və çərşənbə axşamı Ermənistan xarici işlər nazirinin müavini Tehrana səfər edəcək. Biz tərəflərlə davamlı məsləhətləşmələr aparırıq. Zəngəzur və digər məsələlərlə bağlı mövqeyimiz tam aydındır. Ermənistan və Azərbaycan arasında hər hansı sülhü alqışlayırıq və əvvəllər də iki ölkə arasında sülh prosesinə yardım və əməkdaşlığa hazır olduğumuzu bildirmişik.
Nazir əlavə edib: Regionla bağlı mövqeyimiz də şəffafdır. Biz bütün region ölkələrinin ərazi bütövlüyünü və əraziləri üzərində tam suverenliyini dəstəkləyirik. Həmçinin beynəlxalq sərhədlərin qorunmasının tərəfdarıyıq və onların dəyişdirilməsini qəbul etmirik. Ermənistan və Azərbaycan arasında imzalanmış birgə bəyanatda da bu üç prinsip – region ölkələrinin suverenliyinə hörmət, ərazi bütövlüyünə hörmət və sərhədlərin dəyişdirilməsinə qarşı çıxmaq – yer alıb. Bunlar tam olaraq İran İslam Respublikasının mövqeyinə uyğundur.
Əraqçi vurğulayıb ki, “dəhliz” məsələsi tamamilə gündəmdən çıxarılıb və söhbət yalnız Ermənistanın ərazisində, bu ölkənin suverenliyi və hüquq yurisdiksiyası altında çəkiləcək tranzit yolundan gedir. Bu layihəni həyata keçirəcək şirkət isə deyilənə görə, Ermənistanda qeydiyyatdan keçmiş və bu ölkənin qanunları çərçivəsində fəaliyyət göstərən Amerika–Ermənistan birgə şirkəti olacaq. Xarici işlərin nazirliyinin bəyanatında qeyd olunduğu kimi, regionda istənilən xarici mövcudluq sülh və sabitlik üçün mənfi nəticələr doğura bilər. Biz bu məsələni həm azərbaycanlı, həm də ermənistanlı tərəfdaşlarımızla müzakirə etmişik və buna təkid etməkdə davam edəcəyik. Hadisələri yaxından izləyirik. İndiyədək əsas mövqelərimiz qorunub, lakin şirkətin ABŞ mənşəli olması ehtimalı narahatlıq yaradır və bu barədə məsləhətləşmələri davam etdirəcəyik.
Xarici işlər naziri sonda qeyd edib: İran regionda istənilən xarici mövcudluq barədə xəbərdarlıq edib və vurğulayıb ki, belə bir addım sülh və sabitliyi təhdid edə bilər. Layihədə ABŞ şirkətinin mümkün iştirakı bizi narahat edir. Bu məsələ tərəflərlə müzakirə olunub və proses diqqətlə izlənir.
