Siyasi Məhbus Ailələrinin Koordinasiya Mərkəzinin sədri: “Biz bunun əksini də gözləmirdik”
Qafqazagency.ir xəbər verir ki,Bu gün, Prezident İlham Əliyev məhkum edilmiş 220 nəfərin əfv olunması haqqında sərəncam imzalayıb.
Əfv edilənlərin 175-i cəzasının qalan hissəsindən azad edilib.
Azadlıqdan məhrumetmə cəzasına məhkum olunmuş 25 şəxsin isə cəzasının çəkilməmiş hissəsi yarıyadək azaldılıb.
Əfv sərəncamına düşənlər arasında Fransa vətəndaşı da var. 1986-cı il təvəllüdlü Teo Klerk Hüqo Bakıda metroya qanunsuz daxil olmaq və qatarlara qrafiti çəkmək ittihamı ilə 2024-cü ilin sentyabrında Nərimanov Rayon Məhkəməsi tərəfindən 3 il azadlıqdan məhrum edilmişdi. Hüqo ilə birlikdı saxlanılan iki nəfər – Yeni Zelandiya vətəndaşı De-Sant Quentin İsmael və Avstraliya vətəndaşı Han Paul isə 6800 manat məbləğində cərimələnmişdi. Məhkumun özü Azərbaycan Fransa ilə münasibətlərdəki gərginliyə görə cəzalandırıldığını bildirmişdi. Onun həbsi ilə bağlı Fransa Xarici İşlər Nazirliyi də mövqe açıqlamış, baş verənləri “əsassız və ayrıseçkilik xarakterli” addım kimi qiymətləndirmişdi.
Əfv edilənlərin sırasında ümumilikdə 16 xarici ölkə vətəndaşı var. Onların arasında İrandan beş, Rusiyadan dörd, Gürcüstan və Pakistandan iki, həmçinin Fransadan, Türkiyədən və Əfqanıstandan bir nəfər var.
Siyasi Məhbus Ailələrinin Koordinasiya Mərkəzinin sədri Zəfər Əhmədov Meydan TV-yə bildirib ki, əfv olunanlar arasında bir nəfər belə siyasi məhbus kimi tanınan şəxs yoxdur.
“Fransızı çıxmaq şərti ilə bir nəfər də siyasi məhbus salınmayıb. Bu əfv fərmanı nəyə lazım idi? Heç səbəbi də bilinmir. Ola bilsin ki, el gözünə belə bir sərəncam imzalanıb. Bu da onu göstərir ki, Azərbaycan hakimiyyəti bütövlükdə hüquqi və siyasi təşəbbüslərə nəinki hazır deyil, heç iradə istəyi də yoxdur. Biz bunun əksini də gözləmirdik”, – Zəfər Əhmədov deyib.
Milli Məclisin İnsan hüquqları komitəsinin sədr müavini Arzuxan Əlizadə isə əfv siyahısında siyasi məhbusların adlarının olmaması ilə bağlı iddianı “əsassız” adlandırıb.
“Bəzi radikal qüvvələrin “siyasi məhbus” hesab etdikləri şəxslərin siyasi fəaliyyətilərinə görə məhbus həyatı yaşadıqları sualdır. Konkret olaraq onların camiyəsində olan şəxslərin əfv siyahısında olmaması ilə bağlı iddiaları əsassız hesab edirəm. İnsanlar arasında fərq qoymaq olmaz. Əfv sərəncamı ilə insanların azadlığa buraxılmalarına sevinməkdənsə, fərqli yanaşma sərgiləmək heç bir siyasətçiyə baş ucalığı gətirən mövqe deyil”, – o, Pravda.az-a açıqlamasında deyib.
2023-cü ildə 182 siyasi məhbusdan cəmi 8 nəfəri əfv edilib. Bunlar Vətəndaş və İnkişaf Partiyasının lideri Əli Əliyev, Sumqayıtdan olan hüquq müdafiəçisi Elçin Məmməd, “Tərtər işi” üzrə məhkum olunmuş 4 nəfər – Nüsrət Qurbanov, Vaqif Əliyev, Süleyman Hacıyev , Seymur Həsənov və “Gəncə işi” üzrə təqsirləndirilən iki nəfər – Samir İbrahimov və Həbib Qurbanov olub.
2024-cü ildə 154 məhbus əfv olunub, onların arasında siyasi məhbus olmayıb.
Azərbaycanda hazırda 360-dan çox siyasi məhbus olduğu bildirilir.
