Dini kəsim Milli Şuranın sabahkı aksiyasına münasibət bildirdi

Sabah Milli Şura Bakının “Məhsul” stadionunda icazəli mitinq keçirəcək. Mitinq əvvəl aprelin 9-una təyin edilsə də, Bakı şəhər İcra Hakimiyyəti aksiyanın 8 aprel tarixində keçirilməsini məqsədəuyğun hesab edib.

Mitinq təşkilatçıları hazırlıq işlərinin başa çatdığını açıqlayıblar.

FaktXəbər olaraq Azərbaycan dini kəsiminin sabahkı mitinqdə iştirak edib-etməyəcəyi ilə bağlı Azərbaycan İslam Partiyasının və “Maarifçiliyə Dəvət” təşkilatının mövqeyini öyrəndik.

AİP-in sədr müavini Akif Heydərli siyasi partiyalar və qurumlar tərəfindən təşkil olunmuş aksiyalardan xəbərləri olduğunu bildirdi, sadəcə, Azərbaycan İslam Partiyası həmin aksiyanın təşkilatçıları qrupunda deyil, aksiyanın təşkil olunmasında və iştirakı üçün dəvətli deyil: “Partiyamız təşkilati cəhətdən iştirakı olmadığı aksiyalarda rəsmi olaraq iştirak etmir. Bizim qərarımız həmişə belə olub.

Buna baxmayaraq, üzvlərimizdən kimsə fərdi olaraq tədbirdən iştirak edə bilər, biz bunu onlara qadağa qoymamışıq.

Aksiyanın keçirilməsin münasibətimizə gəldikdə isə, bu gözlənilən tədbirin  hansı niyyətlə keçirilməsi bizə hərtərəfli bəlli deyil. Amma hazırda ölkədə baş verən bir sıra qanunsuzluq, neqativ hallar məlumdur. Biz də buna rəsmi münasibətimizi etirazımızı bildirmişik. Hakimiyyət qarşısında bu cür etirazların səslənməsi və tələblərin qoyulmasını məqsədəuyğun hesab edirik və əlbəttə, obyektiv konstruktiv tələblər məqsədəmüvafiq və etirazın bir forması olaraq aksiya şəklində həyata keçirilirsə, Konstitusiya və insan haqlarına uyğun qiymətləndiririk.”

“Maarifçiliyə Dəvət” təşkilatının sədri Elçin Manafov bildirdi ki, fərd olaraq aksiyada iştirak edəcək və buna da səbəbləri var: “Bizim öz sözümüz, haqlı etirazlarımız var. Əslində, əgər bu problemlər həll olunarsa heç mitinq tərəfdarı deyiləm. Açığı, sabah ilk dəfədir ki, Milli Şuranın mitinqdə iştirak edəcəyəm. Mən indiyə qədər sivil yolla – danışıqlar yolu ilə problemlər həllinin tərəfdarı olmuşam. Amma həll olunmadıqda, biz də etirazçılara qoşuluruq. İslama və islamçılara münasibətin aydınlaşmasını istəyirik. Görək axı nə istəyirlər günahsız qardaşlarımızdan. Öndə gedənlərimiz, liderlərimiz tutulur –Mövsüm Səmədov, Abgül Süleymanov, Taleh Bağırov, Elşən Mustafayev, hansı ki, maarifçi adam idi. Son zamanlarda da Sərdar Hacıhəsənlini tutublar, cümə namaz qıldığına görə. Bizə tribuna vermirlər ki, haradasa öz haqq sözümüzü deyək. Və bəyanat verəndə, sözümüzü də deyəndə heç bir əhəmiyyət verilməyib.

Ölkəmizdə İslam Oyunları keçiriləcək, artıq hazırlıqlara başlanılıb. Belə bir vaxtda rəvadırmı ki, islamçılara təzyiqlər olunur? Bundan əlavə, sosial problemlər də başdan aşır. Mən də onların dərdinə şərikəm. Amma kimsə bizim yerimizə hiss eləsə, dərk eləsə görər ki, mənəviyyatımıza vurulan zərbə onlardan da böyükdür. Bu gün bizim liderlərimizi həbs edirsinizsə, cəmiyyətimizdə İŞİD, vəhabilik kimi  fəsad baş alıb gedəcək.”