Qafqazagency.ir xəbər verir ki,Həmas hərəkatının sözçüsü Fövzi Bərhum Fələstin Müqavimətinə dəstək verən ölkə və qüvvələrə təşəkkür edib və bu dəstəyi “şərəfli mövqe” adlandırıb.
Bərhum bildirib ki, hərəkatın əsas prioriteti İsrailin hücumlarının dərhal dayandırılması və Qəzzaya qarşı aparılan “soyqırım müharibəsinə” son qoyulmasıdır.
O vurğulayıb ki, Həmas Fələstin xalqının dəyişməz milli hüquqlarına sadiqdir və bu dəyərləri müdafiə etməkdə davam edəcək.
Onun sözlərinə görə, İsrail ordusu qarşısına qoyduğu hədəflərə çata bilməyib:
“İşğalçı rejim nə zor gücü ilə əsirlərini azad edə bildi, nə də müqavimətə alternativ yarada bildi. Onlar xalqımızı didərgin saldılar, aclıq və qırğınla üz-üzə qoydular, amma məqsədlərinə çata bilmədilər.”
Bərhum deyib ki, müharibə qurbanlarının 95 faizi dinc əhalidir. O həmçinin bildirib ki, 80 fələstinli əsir İsrail həbsxanalarında işgəncələr nəticəsində həlak olub.
Həmas sözçüsü əlavə edib:
“Fələstin xalqının Müqavimətə dəstəyi işğalçıların bütün planlarını puç edən möhkəm bir qayadır. “Əl-Əqsa Tufanı” əməliyyatı Fələstin məsələsini gündəmdən çıxarmaq cəhdlərinə tarixi cavab oldu və düşmənin əsl simasını göstərdi.”
Bərhum ABŞ prezidenti və işğalçı İsrailin baş naziri Benyamin Netanyahu hökumətini Qəzzadakı müharibə cinayətlərinin birbaşa məsuliyyətini daşımaqda ittiham edib. O bildirib ki, Həmas bütün atəşkəs təkliflərinə məsuliyyətlə yanaşıb və hərəkatın nümayəndə heyəti hazırda Misirdə danışıqlar apararaq Fələstin xalqının tələblərinə cavab verən bir razılaşmaya nail olmağa çalışır.
Bərhumun sözlərinə görə, əldə ediləcək razılaşma “hücumların tam dayandırılmasını, İsrail qoşunlarının Qəzzadan çıxarılmasını, qaçqınların geri qayıtmasını, Qəzzanın yenidən qurulmasını və əsirlərin ədalətli mübadiləsini” nəzərdə tutmalıdır. O, Netanyahu hökumətinin keçmişdə olduğu kimi danışıqları pozmağa cəhd göstərə biləcəyi barədə xəbərdarlıq edib.
Həmas sözçüsü çıxışının sonunda dəstək göstərən ölkə və hərəkatlara təşəkkür edərək deyib:
“Biz Fələstin xalqına və Müqavimətə dəstək verən bütün tərəflərə minnətdarıq. Xüsusilə İran İslam Respublikası, Yəmənin Ənsarullah hərəkatı və Livanın Hizbullah hərəkatına təşəkkür edirik.”
O, həmçinin Qətər, Misir və Türkiyənin vasitəçilik səylərini, həmçinin Qəzzaya yardım karvanları göndərənləri yüksək qiymətləndirib və bütün fələstinli qüvvələri Müqavimət ətrafında birliyə çağırıb:
“Xalqımızın öz torpağında mühasirəsiz və qəyyumluqdan azad yaşamaq haqqı təbii bir haqqdır. Paytaxtı Qüds olan müstəqil Fələstin dövlətinin qurulması isə indi hər zamankından daha yaxın görünür.”
