Bakının Azərbaycan prospekti, Mirzə Fətəli Axundzadə, Nizami və Mirzəağa Əliyev küçələrində yerləşən yaşayış sahələri avqustun 19-da səhərdən axşamadək qazsız qalıb.
Qafqazagency.ir xəbər verir ki,Ərazidə yaşayan sakinlər bildiriblər ki, qazın verilməsi Bakı Şəhər İcra Hakimiyyəti tərəfindən aparılan söküntü işləri ilə əlaqədar dayandırılıb.
Onların sözlərinə görə, Bayırşəhərdə aparılan söküntü işləri səbəbindən işıq və qaz tez-tez kəsilir və bəzən uzun müddət bərpa olunmur.
Sakinlərdən biri Zahidə Əzizova Meydan TV-yə bildirib ki, vəziyyət avqustun 18-dən başlayaraq daha da pisləşib:
“Ərazidə söküntü işləri başlayandan bəri qaz və işığımız mütəmadi olaraq kəsilir və saatlarla verilmir. Avqustun 18-də bütün gün işığımız olmadı. Dünən (avqustun 19-da) səhər saat 10:30-da isə qazı kəsdilər. Axşam saat 6 idi, hələ də qaz verilməmişdi. Camaat toplaşdı, sahə müvəkkilinin müşayiəti ilə hazırda söküntü işləri aparılan əraziyə getdik. Gördük ki, briqada artıq orada yoxdur. Öyrəndik ki, söküntü zamanı qaz xətləri zədələnib”.
Zahidə Əzizova deyir ki, “Azəriqaz”ın qaynar xəttinə zəng vurduqda onlara bildirilib ki, sızmanın qarşısını almaq üçün bərpa işləri iki gün davam edəcək və bu müddət ərzində qaz olmayacaq.
Lakin sakinlərin etirazından və sahə müvəkkilinin müdaxiləsindən sonra qazın verilməsi həmin gün axşam saatlarında bərpa edilib.
“Halbuki bizə demişdilər ki, xətt iki günə bərpa olunacaq. Bunu bilərəkdən edirlər. Məqsəd evlərimizi sökməkdir, biz isə dirənirik. Ərazidə 1740 mülkiyyətçi var, burada 7-8 minə yaxın insan yaşayır. Xəstəsi, qocası, uşağı olan bu qədər insanı şəxsi maraqlar naminə günlərlə qazsız saxlamaq vəhşilikdir”.
Zahidə Əzizova deyir ki, avqustun 20-də də briqada qazın verilişini yenidən dayandırmağa cəhd edib, lakin sakinlərin müqaviməti ilə qarşılaşıb:
“Onlar ərazidə daha iki gün də söküntü işləri aparmaq istəyirlər. Bu gün bura buldozer yeridə bilmədilər. Biz buna imkan vermədik və müqavimət göstərməyə davam edəcəyik. Söküntü aparacaqlar deyə biz iki gün qazsız qalmalıyıq?”
Sakin həmçinin bildirir ki, ərazidə söküntü işləri aparan aidiyyəti qurum tərəfindən onlara qarşı təzyiqlər var:
“Bakı Şəhər İcra Hakimiyyətinin nəzarət-təftiş şöbəsinin rəhbəri Zülfəli İsmayılov insanların hissləri ilə oynayır. Bizə təzyiq göstərirlər, deyirlər ki, evlərin kvadratına 2700 manat veririk, almasanız, sonra onu da verməyəcəyik. Evlərin zirzəmilərini, pəncərə içlərini, həmçinin divariçi dolabları ölçmürlər. Camaatın evinin 100 faiz dəyərindən 30 faizini verirlər, 70 faizini isə dolayısı ilə mənimsəyirlər”.
Bakı Şəhər İcra Hakimiyyətindən Meydan TV-nin zənglərinə cavab verilməyib.
“Azəriqaz” İstehsalat Birliyinin qaynar xəttindən isə bildirdilər ki, həmin ərazi üzrə qazın verilməsi elə həmin gün, yəni avqustun 19-da bərpa edilib.
Bakıda tarixi bina və məhəllələrin sökülməsinə hələ 2000-ci illərin əvvəlindən başlanılıb. “Sovetski məhəlləsi”nin bir hissəsi, Dağüstü Parkın ətrafı, Füzuli və digər mərkəzi küçələrdə yerləşən çoxsaylı tarixi tikililər və məhəllələr ləğv edilib. Söküntülər adətən şəhərin “müasir inkişafı” ilə əsaslandırılıb.
Mütəxəssislər isə hesab edirlər ki, bu proses həm memarlıq irsinə, həm də formalaşmış şəhər kimliyinə zərər vurur və proses hələ də davam edir.
Rəsmi məlumatlara görə, vaxtilə Bakıda 1956 tarixi bina mövcud olub. Lakin Nazirlər Kabineti tərəfindən müxtəlif dövrlərdə bu abidələrin bir hissəsi dövlət qeydiyyatından çıxarılıb.
Nəticədə, son illərdə 70-ə yaxın çoxəsrlik tarixi bina sökülüb, bəzi məhəllələr isə ləğv olunub.
2012-ci ildə “Tarix və mədəniyyət abidələrinin qorunması haqqında” qanunun 7-ci maddəsinə edilən dəyişiklik də bu prosesə daha da təkan verib.
Dəyişikliklərə əsasən, hər hansı bir tarixi binanın dövlət mühafizəsi statusunun ləğvi üçün Mədəniyyət Nazirliyi, Dövlət Şəhərsalma və Arxitektura Komitəsi, Azərbaycan Milli Elmlər Akademiyası, müvafiq rayon icra hakimiyyəti və Nazirlər Kabinetinin razılığı tələb olunur.
Memarların fikrincə, 2023-cü ildə təsdiqlənmiş Bakının yeni Baş planına əsasən, tarixi əhəmiyyətə malik məhəllə və binalar qorunmalı, onların sökülməsinə yol verilməməlidir.
Lakin bəzi məmurlar şəxsi maraqları naminə bu əraziləri yeni planın tələblərinə məhəl qoymadan dövlət qeydiyyatından çıxarır və nəticədə həmin tikililər sökülür.
Memarlar isə bununla bağlı davamlı olaraq aidiyyəti qurumlara məktublar ünvanlayıb, bu söküntülərin dayandırılmasını istəyirlər. Onlar deyirlər ki, müraciətləri hər dəfə nəticəsiz qalır.
