Amnesty: Azərbaycan idmandan sui-istifadə edərək çirkli pulların yuyulmasına nail olur

Yeni il gecəsi Tur de Ski-nin üçüncü mərhələsində həm kişilər, həm də qadınlar komandasının bütün idmançıları formaları üzərində sponsor olaraq “Azərbaycan” adı ilə yarışdılar. Ölkənin reklamı həmçinin stadionun içərisindəki qaçış meydançasının mərkəzində və finiş zonasındakı kənar panellərdə də iri hərflərlə görünürdü.

Tour de Ski — xizək sürmənin kross-kantri (cross-country) növü üzrə keçirilən, çoxmərhələli və yüksək prestijli beynəlxalq turnirdir. Dünya Kuboku mərhələsi turniri 28 dekabr-4 yanvar tarixləri arasında İtaliyanın Val di Fiemme şəhərində keçirilir və ənənəvi final dırmanış mərhələsi ilə başa çatır.

Azərbaycan Dövlət Turizm Agentliyi ilə Beynəlxalq Xizək və Snoubord Federasiyası (FIS) arasında qış turizminin və qış idman növlərinin inkişaf etdirilməsi, Azərbaycanın qış idman növləri üzrə nüfuzlu beynəlxalq yarışlara ev sahibliyi etməsi adı ilə tərəfdaşlıq haqqında müqavilə imzalanıb. Müqavilə keçən il may ayında 5 illik müddətinə bağlanıb.

Bu müqavilənin nə qədər məbləğə başa gəldiyi açıqlanmayıb.

Yeni tərəfdaşlıq çərçivəsində, Azərbaycan Turizm Bürosu ilə əməkdaşlıq edərək, FIS beynəlxalq arenada öz fəaliyyətini genişləndirir və Azərbaycanı “Global Destination Partner” statusunda təmsil etdiyi vurğulanır. Dövlət Turizm Agentliyi bildirir ki, dövlət qış idman növlərinin inkişafını və dünyada tanıdılmasını təşviq etməyi qarşısına məqsəd qoyur.

Amnesty International Norveç təşkilatının siyasi məsləhətçisi Konde Tangberg bildirir ki, bu idman vasitəsi ilə çirkli pulların yuyulması əməliyyatıdır və siyasi məqsədlər üçün istifadə olunur:

“Azərbaycanın dövlət turizm agentliyi vasitəsilə xizək turnirlərinə sponsorluq etməsi, əlbəttə ki, sırf hakimiyyətin siyasi maraqlarına xidmət etməsi ilə bağlıdır”, – deyə o, bildirib.

Amnesty International təşkilatının məlumatına görə, Azərbaycan uzun müddətdir insan haqlarının pozulmasına görə tənqid olunur. Ölkədə 30-dan çox jurnalist həbsdədir və Amnesty bildirir ki, müstəqil təşkilatların və medianın orada işləməsinə icazə verilmir.

“Bu tip müqavilələr, ölkə ilə müsbət əlaqələr yaratmaqla yanaşı, həm insan hüquqlarını aqressiv şəkildə boğan, həm də iqlimə düşmən siyasət yürüdən ölkə hakimiyyətlərini normallaşdırır və legitimləşdirir”, – deyə FIS-in sponsor seçimi barədə Konde Tangberq bildirir.

May ayında mətbuata açıqlama verən Norveç xizək federasiyasının prezidenti Tove Moe Dyrhaug, FIS ilə Azərbaycan arasında bağlanmış müqavilədən narazılığını ifadə edərək, bunun onların işlədiyi dəyərlərə uyğun olmadığını düşünərək beynəlxalq idman növlərində daha çox şəffaflığa və daha yaxşı idarəetməyə ehtiyac olduğunu vurğulayib.

Norveç qəzeti, Amnesty tərəfindən tənqid edilən FIS ilə əlaqə saxlayıb.

FIS elektron poçtda cavab olaraq bildirir ki, digər məsələlərlə yanaşı, Azərbaycan Dövlət Turizm Agentliyi ilə əməkdaşlığı onların sahələrini dünyanın getdikcə daha çox yerinə genişləndirmək üçün “vacib strateji addım”dır.

Yeri gəlmişkən, Tur de Ski yarışında iştirak edən 212 idmançının – həm qadın, həm də kişilər arasında – heç biri Azərbaycandan deyil.

Digər tərəfdən, Ermənistanın bir kişi idmançısı Mikael Mikaelyan sponsorun adını öz formasının üzərində görünməməsi üçün silməyi seçib. O, bu qaydaları pozduğuna görə isə cərimələnib.

Azərbaycan əvvəllər də neft gəlirlərindən əldə edilən vəsaitlərlə Avropa Futbol Assosiasiyalarının İttifaqı (UEFA), İspaniyanın ən böyük klublarından biri Atletiko Madrid və Türkiyənin ən böyük klublarından biri Galatasaray ilə əməkdaşlıq çərçivəsində futbol sponsorluğuna investisiya qoymaq üçün istifadə edib. Atletiko Madrid ilə müqavilə 15.5 milyon, Galatasarayla isə 15 milyon avroya başa gəlmişdi.

Ölkə həmçinin artıq neçə illərdir Formula 1 Dünya Çempionatı mərhələsinə ev sahibliyi edir.