İmam Əli (ə) Ziyarətgahında Qədir Xum Bayramına genişmiqyaslı hazırlıq – FOTO

Qafqazagency.ir xəbər verir ki, Qədir-Xum bayramı münasibətilə İraqın müqəddəs Nəcəf şəhərində yerləşən İmam Əli (ə) Ziyarətgahı genişmiqyaslı hazırlıq işlərinə başlayıb. Bu il keçiriləcək tədbirlər çərçivəsində 250 mindən çox təbii gül hərəmin müxtəlif hissələrində yerləşdiriləcək.

Hərəmin Tərtibat və Bəzədilməsi Şöbəsinin müavini Barıq Hadi Cabbarın verdiyi məlumata görə, bəzəklər təkcə hərəmin daxilini deyil, həm də onun əsas girişlərini, ətraf küçələri, zəvvarlar üçün ayrılmış sahələri və Nəcəf şəhərinin müxtəlif bölgələrini əhatə edir.

Əllamə Əli ibn Əbu Talibin (ə) məqbərəsi ətrafında keçiriləcək Qədir-Xum həftəsi çərçivəsində İraqın bütün müqəddəs ziyarətgahlarında, o cümlədən Kərbəla və Kazimeyn şəhərlərində də gül bəzəkləri və dini mərasimlər keçiriləcək. Təşkilatçılar bildirir ki, bu ilki proqramda dini, mədəni, bədii və əyləncəli tədbirlər, habelə bayraq qaldırma mərasimi xüsusi yer alacaq.

Məlumata görə, Hərəmin müqəddəs zərihi ətrafında 15,000 təbii gül yerləşdirilib. Daxili və xarici rüvəqlərə 10,000-dən çox gül düzülüb. Köhnə şəhər və müqəddəs hərəmin aparıcı küçələrinə minlərlə gül yerləşdirilib.

Təşkilatçılar bildirir ki, bu tədbirlər Qədir-Xum bayramının mənəvi mahiyyətini vurğulamaq, zəvvarlara mənəvi ab-hava bəxş etmək və İslam dünyasının birliyinə çağırış məqsədi daşıyır.