Qafqazagency.ir xəbər verir ki, Tarif Şurasının qərarına əsasən, 2026-cı il yanvarın 1-dən Aİ-92 markalı benzinin 1 litri 5 qəpik, dizelin 1 litri isə 10 qəpik artacaq. Bir sözlə yanvarın 1-dən Aİ-92 markalı benzinin 1 litri 1 manat 15 qəpiyə, dizelin 1 litri isə 1 manat 10 qəpiyə olacaq.
Məlumatda bildirilir ki, “son illərdə iri şəhərlərin əhalisi artıb və şəhərətrafı ərazilərdə yaşayanların sayı çoxalır. Bu isə nəqliyyat sistemləri və sərnişin daşımaları üçün yeni çağırışlar yaradıb.”
Xatırladılır ki, 2025-ci ilin sentyabrında “İctimai nəqliyyat” Məqsədli Büdcə Fondu yaradılıb. Tarif Şurasının məlumatına görə, “Fonddakı vəsaitin bir hissəsi benzinin, dizelin və maye qazın hər litrinə tətbiq olunan yol vergisindən gəlir. Qanunvericiliyə edilən dəyişikliyə əsasən, yanacağın hər litrinə görə yol vergisi 7 qəpik müəyyən edilib. Bu səbəbdən də yanacağın qiymətləri artırılıb.
Tarif Şurası 2024-cü il iyulun 1-dən Aİ-92 benzininin pərakəndə satış qiymətini 1 litr üçün 10 qəpik artıraraq 1.10 manat, dizel yanacağının qiymətini isə 20 qəpik artıraraq 1 manat müəyyən etmişdi.
Bundan əlavə, Şura elektrik enerjisi və təbii qaz üzrə tariflər də müəyyən edib. Qərara əsasən, 2026-cı il yanvarın 1-dən istehlak səviyyəsindən asılı olmayaraq qaz və elektrik üçün aylıq ödəniş 1-3 manat olacaq.
Elektrik enerjisi üzrə mənzil və fərdi evlər, həmçinin kiçik müəssisələr (bir fazalı enerji istifadə edənlər) 1 manat, böyük müəssisələr (üç fazalı enerji istifadə edənlər) isə 3 manat ödəyəcək.
Təbii qaz üzrə də mənzil və fərdi evlər, həmçinin kiçik müəssisələr 1 manat, böyük sənaye obyektləri isə 3 manat ödəyəcək.
İndiyədək vətəndaşlar yalnız istifadə etdikləri elektrik və qazın həcminə görə ödəniş edirdilər. Yeni qərarla isə istehlakdan asılı olmayan sabit abonent haqqı tətbiq olunacaq.
Şura açıqlamasında bildirir ki, bu addım “infrastrukturun saxlanması, xidmətlərin göstərilməsi və əməliyyat xərclərinin istehlakçılar arasında balanslı bölüşdürülməsi” məqsədini daşıyır.
Qurum həmçinin xatırladıb ki, bir çox ölkələrdə belə sabit ödənişlər mövcuddur və bu, enerji təchizatının davamlılığı üçün vacibdir.
Ekspertlər deyir ki, elektrik enerjisi və təbii qaz üzrə yeni qərar rəsmi olaraq “qiymət artımı” adlandırılmasa da, istehlakçılar üçün hər ay əlavə məcburi ödəniş deməkdir. Enerjidən istifadə edib-etməməsindən asılı olmayaraq, abonentlər artıq şəbəkəyə qoşulu olduqları üçün ödəniş etməli olacaqlar.
