Finlandiya sahillərində lövbər salmış Sent-Vinsent və Qrenadin adaları bayrağı altında üzən Fitburg adlı quru yük gəmisi Finlandiyanın Elisa telekommunikasiya şirkətinə məxsus sualtı kabeli zədələyib.
Qafqazagency.ir xəbər verir ki,Ölkənin sahil mühafizəsi dərhal helikopterlərin cəlb edildiyi xüsusi əməliyyat keçirib. Gəminin 14 nəfərlik ekipaj üzvü saxlanılıb. Onların arasında Rusiya, Azərbaycan, Qazaxıstan və Gürcüstan vətəndaşları da var. Bildirilir ki, gəmi Rusiyanın Sankt-Peterburq şəhərindən İsrailin Hayfa limanına doğru hərəkət edirmiş.
Finlandiya hüquq-mühafizə orqanları sualtı telekommunikasiya kabelinin zədələnməsinin diversiya xarakteri daşıya biləcəyi versiyasını nəzərdən keçirir. Xüsusilə ona görə ki, son illərdə Baltik dənizində bu cür insidentlər dəfələrlə baş verib və adətən Rusiyanın “kölgə donanması” adlandırılan gəmiləri ilə əlaqələndirilib.
Saxlanılmış Fitburg ticarət gəmisi Fitburg Shipping Co Ltd şirkətinə məxsusdur və baş ofisi Türkiyədə yerləşən Albros Shipping & Trading Ltd gəmiçilik şirkəti tərəfindən idarə olunur.
Albros Shipping & Trading şirkəti Rusiya, Azərbaycan və Türkiyə bazarlarında fəaliyyət göstərən onlarla quru yük gəmisi və tankerə sahibdir. Şirkətin törəmə strukturları da mövcuddur, o cümlədən Sankt-Peterburqda ofisi yerləşən Albros-Petersburg müəssisəsi.
Albros Shipping & Trading Ltd Türkiyənin ən iri gəmiçilik şirkətlərindən biri hesab olunur. Beynəlxalq kommersiya reyestrinin məlumatına görə, şirkətin təsisçisi və əsas sahibi Azərbaycandan olan, hazırda Türkiyədə fəaliyyət göstərən biznesmen Raim Alekperovdur. Ona şirkətdə 76 faiz pay məxsusdur. Alekperov Türkiyənin gəmiçilik sənayesində, xüsusən də Türkiyə ilə Rusiya arasında dəniz daşımaları sahəsində tanınmış fiqur sayılır.
Raim Alekperovun adı 2016-cı ildə Beynəlxalq Araşdırmaçı Jurnalistlər Konsorsiumu tərəfindən dərc edilmiş Paradise Papers sənədlər toplusunda da yer alır.
