Qafqazagency.ir xəbər verir ki,Həzrət Fatimə Məsumənin (s.ə) vəfat etdiyi gecə Xanımın müqəddəs hərəmində minlərlə insan əzadarlıq mərasimi keçirdi. Mərasimdə moizə oxuyan Əli Rza Pənahiyan Xanım Məsumənin (s.ə.) həyatının incə nöqtələrini işıqlandırdı. Ardınca məddah Seyyid Məcid Bəni məclisi növhə və rövzələrlə bəzədi. Gecənin sonu isə Abbas Heydərzadənin Kumeyl duasının oxunması ilə yekunlaşdı.
Xatırladaq ki, İmam Rzanın (ə) Məmunun təkidi ilə məcburi İrana gəlişindən bir il sonra hicrətin 201-ci ilində (miladın 823-cü ili) Həzrət Məsumə (s) qardaşını görmək üçün bir dəstə möminlər ilə Xorasan vilayətinə yollanır. O, Savə şəhərinə çatanda xəstələnir. Xanımın Savədə olduğundan xəbər tutan Qum camaatı xanımı qarşılamağa gəldilər ki, onu Quma dəvət etsinlər. Qumlulardan olan Musa ibn Xəzrəc xanımın dəvəsinin yüyənini tutub, Quma öz evinə gətirir. Məsumə xanım Qumda 16-17 gün qaldıqdan sonra rəbius-sani ayının 12-ci günü burada da vəfat edir.
Hal-hazırda Xanımın hərəmi olan ev onun dünyasını dəyişdiyi məkandır. Bir müddətdən sonra Xanımın qəbri üzərində doqquzuncu imamın qızı Zeynəb xanım tərəfindən türbə inşa edilir.
Məsumə xanımın (s) ziyarəti haqda İmamlardan (ə) çoxlu hədislər nəql olunmuşdur. Bu hədislərin hər biri Xanımın uca məqamını çatdırır.
İmam Sadiq (ə) bu haqda buyurub: Hər kim onu ziyarət etsə, cənnət ona vacib olar.
İmam Sadiq (ə) buyurub: Onu ziyarət etmək cənnətə bərabərdir.
Səd ibn Səd Əşəri imam Rzadan (ə) Məsumə xanımın (s) ziyarəti haqda soruşdu. İmam buyurdu: Hər kim onu ziyarət etsə, cənnət savabına nail olar.
İmam Rza (ə) başqa bir hədisdə buyurub: Hər kim onun məqam və mənzilətini tanıyaraq ziyarət etsə, cənnət ona vacibdir.
İmam Rza (ə) bu haqda başqa bir hədisdə buyurur: Məsuməni (s) Qumda ziyarət edən məni ziyarət etmiş kimidir.
