“Polislər üzərimizə hücum edərək bizə zorakılıq göstərdi. Uşaq ağladığına görə onu sakitləşdirməyə çalışdım, polislər bizi sürüyərək, maşına salmağa çalışdılar və polis bölməsinə aparıldıq. Orada polislər bizi çılpaq soyundurmaqla və zorlama ilə təhdid etdilər”.
Bu sözləri hazırda Bakı İstintaq Təcridxanasında saxlanılan Nigar Bağırova deyib. O, avqustun 15-də saxlanılan 6 inanclı qadından biridir. Nigar Bağırovanın sözlərinə görə, həmin gün onlar İmam Hüseynin 40-ı ilə bağlı Binədə ehsan paylayıblar və Fələstinlə bağlı şüarlar səsləndiriblər. Qadınlar qollarına Fələstin bayrağı bağlayıblar və “Fələstinə azadlıq!”, Azərbaycanda baş verən haqsızlıqlara etiraz şüarları səsləndiriblər. Bu zaman polis hücumuna məruz qalıblar.
“Hicabımı zorla başımızdan çıxartdılar”
Saxlanılan 6 qadın barəsində Xəzər Rayon Məhkəməsində 3 aylıq həbsqətimkan tədbiri seçilib. Onlara qarşı qabaqcadan əlbir olan qrup şəklində quldurluq maddəsi ilə cinayət işi açılıb.
Nigar Bağırova deyib ki, onunla birgə Şəhla Fərəcova və Aytən adlı qadın, həmçinin 1 azyaşlı və 2 yeniyetmə saxlanılıb. Onun sözlərinə görə, polislər oxumağa imkan vermədikləri sənədləri zorla imzalatdırıblar. Həmçinin onun başından hicabını açmaqla təhdid ediblər. Onunla birgə saxlanılan Şəhla Fərəcovanın qollarını arxadan qandallandığını, uşaqlarının isə ondan zorla ayıraraq naməlum yerə aparıldığı bildirilir:
“Polisin etdiyi qanunsuzluğa etirazıma görə təhdid etdilər ki, ağzımı yapışqan lentlə (skoç) bağlayacaqlar. Aytən adlı qadın və mənim hicabımı zorla başımızdan çıxartdılar”.
Nigar Bağırova onu da deyib ki, saxlanıldıqdan sonra evində axtarış aparılıb:
“Təxminən 20 polis var idi, aralarında qara maskalılar, Anar adlı müstəntiq də iştirak edirdi. Vəkil isə axtarışda yox idi. Evimizin çölündə müşahidə kamerası var. Onu və modemi sökdülər, evin işıqlarını söndürdülər. Özləri ilə gətirdikləri çap materaillarını, yaddaş kartını (flashcard) mənim əşyam kimi təqdim edərək müsadirə etdilər”.
Bağırova qeyd edib ki, evindən ona məxsus şəxsi əşyalarını, kitablarını, planşetini, dini bayraqları da götürüblər. Onun sözlərinə görə, yenidən Xəzər Rayon Müvəqqəti saxlanma yerinə aparılıb, yolboyu maska taxmış Seyid adlı şəxsin təhdid və təhqirinə məruz qalıb:
“Ora gətirilidikdən sonra 3 zərərçəkən qadın gətirdilər və üzləşmə apardılar. Guya biz onlara hücum etmişik. Qadınlardan biri İlham Əliyevi tərifləyirdi, deyirdi ki, “sənin uşağın yoxdur, mənim isə iki uşağım var. Niyə uşaqpulu tələb edirsən? Mən uşaqlarımı yaxşı saxlayıram.
Özünü zərərçəkən kimi təqdim edən qadın bildirdi ki, guya biz uşağa və ona hücum etmişik, şüşələri sındırmışıq. Digəri isə bildirdi ki, guya biz qadına və uşağa hücum edərkən etiraz edib, biz həmin qadına da hücum etmişik”.
“İlham Əliyev bizim vətənimizi talayır, sərvətimizi oğurlayır, millət pis vəziyyətdə yaşayır”
Bağırovanın sözlərinə görə, saxlanılan digər qadınlar – Xoşqədəm Quliyeva, Şərqiyyə Sadıqova, Arzu Hüseynova onlarla birgə ehsan paylamayıb, ümumiyyətlə, orada olmayıblar. Həmin qadınların da evlərində axtarış aparılıb. O, deyir ki, digər qadınların da həbs olunma ehtimalı var:
“Biz ölkədəki haqsızlıqlara, Tərtər cinayətlərinə, qazilərin intiharlarına, bahalığa, uşaqpulunun verilməməsinə etiraz etmişik. İlham Əliyev bizim vətənimizi talayır, sərvətimizi oğurlayır, millət pis vəziyyətdə yaşayır”.
Bağırovanın sözlərinə görə, həmin gün Fələstinlə bağlı etiraz etməyi özlərinə borc biliblər:
“İsrail Fələstinə yardım göstərilməsinə imkan vermir, uşaqlar aclıqdan həyatını itirir. Azərbaycan dövləti də Fələstinə hümanitar yardım göndərir. Lakin İlham Əliyev siyasətçidir, özünü sülhsevər kimi göstərir. Deyir ki, guya din azaddır. Bəs niyə bu qədər dindar həbs olunub? Deyirlər ki, guya İlham Əliyevin ölkədəki vəziyyətdən xəbəri yoxdur. Keçmişdə padşahlar sadə paltar geyinib, xalqın problemləri ilə maraqlanardı. İndi internet dövrüdür, necə yəni xəbəri yoxdur?
“Təkid edirdilər ki, evə yerləşdirdikləri bu əşyalarla şəkil çəkdirim”
Digər saxlanılan Şərqiyyə Sadıqova deyir ki, İmam Hüseynin 40 mərasiminə qoğal göndərdiyi üçün həbs olunub. O, 3-cü qrup əlildir, ingilis dili müəllimidir. Elə avqustun 15-də də onlayn dərs keçirdiyi üçün mərasimə qatılmayıb:
“Dedilər ki, kimin gücü nəyə çatırsa etsin. Mənim də gücüm qoğala çatdı. Ehsan üçün 44 qoğal bişirib, göndərdim. Evdə dərs keçən zaman xəbər gəldi ki, Şəhla xanım tutulub, uşaqlarını döyüblər, içimə bir hiss doldu ki, bizə də gələcəklər. Yenə də daxili rahatlığımı pozmadım. Çünki idealım olan şəxslər – imamlar, peyğəmbərlər bu yoldan keçiblər”.
Bir neçə saat sonra həqiqətən də 10-dan çox maskalı polis Şərqiyyə Sadıqovanın evinə onu həbs etmək üçün gəliblər. İnanclı şəxs deyir ki, mənzilinə ona aid olmayan dini əşyalar yerləşdiriblər:
“Sehrbaz kimi evdən bizə aid olmayan əşyaları “ya Hüseyn” yazılmış, heç üzünü görmədiyim polislər yaddaş kartları, disklər tapdılar. Təkid edirdilər ki, evə yerləşdirdikləri bu əşyalarla şəkil çəkdirim, mən etiraz etdim”.
Şərqiyyə Sadıqova deyir ki, Xəzər RPİ-də dindirilərkən, vəkillə təmin olunmayıb. Müstəntiq ondan Fələstinə niyə dəstək olmaları ilə bağlı soruşub. Həmçinin o, qadına “bu hakimiyyətdən nə istəyirsiniz?” sualını verib.
“Cavabında hicablı halda şəxsiyyət vəsiqəsində fotonun olmasını istədiyimi və Aşura mərasimində 14 yaşdan balaca uşaqların da məscidə buraxılmasını istədiyimi dedim. Mən dinimi azad şəkildə yaşamaq istəyirəm. Hicablı xanımlar fotoda saçları göründüyü üçün şəxsiyyət vəsiqələrindən istifadə edə bilmirlər. Vəsiqənin vaxtı bitəndə gedib, dəyişmirlər. Beləcə, biz cəmiyyətdən təcrid olunuruq”, – deyə Sadıqova bildirib.
İnanclı şəxs heç bir təqsirinin olmadığını deyir və azadlıq tələb edir:
“Biz kasıb ailəyik. Mən müəllimlik edərək, ailəmə dəstək oluram. Himayəmdə 2 və 3 yaşlarında iki oğlum var. Birinin əqli geriliyi var. Oğlumun yanında olmamağım onun üçün travmadır. Özüm ömürlük əliləm, sağlamlığımın 50 faizini itirmişəm. Azadlığa çıxıb, uşaqlarıma qovuşmaq istəyirəm”.
“Məni məsxərəyə qoyurdular, təhqir edirdilər”
Aytən İbrahimova da həmin gün saxlanılıb.
“Bir onu gördüm ki, bizi polis maşınına çırpdılar. Məni, Şəhlanı və onun 2 azyaşlı övladını PPX maşınının arxa qapısının arasında sıxdılar. Dedim ki, imkan verin, heç olmasa ayağımızı maşının içərisinə qoyaq, sonra qapını örtün. Təxminən 10 dəqiqə qapının arasında əzməyə davam etdilər, yazıq uşaqlar nəfəs ala bilmirdilər. Qollarımda və kürəyimdəki göyərtilər o zaman yaranıb”, – Aytən İbrahimova deyib.
Meydan TV-nin əməkdaşı qadının bədənindəki xəsarətləri görüb, onun sol qolunun dirsək və biləkdən yuxarı hissəsində göyərmələr, sağ qolunda dirsək nahiyəsində sıyrıq, dizdən yuxarı hissədə göyərmə, sol ayaqda topuq və topuqdan yuxarı hissədə göyərmə izləri, kürəyinin sağ tərəfində göyərmə izi və əzilmələr olub.
Aytən İbrahimova deyib ki, hansı əsaslarla saxlanıldığını yalnız hakim qarşısına çıxarılarkən bilib. Polis bölməsində onunla heç bir hüquqi söhbət aparılmayıb:
“Polis bölməsində 5-6 polislə bir otqada saxlanıldım. Məni məsxərəyə qoyurdular, təhqir edirdilər. Deyirdilər ki, sizə Xomeyni lazımdır? Özünüzü onlar üçün öldürürsünüz? İranı söyürdülər. Deyirdilər ki, gedin, İranda yaşayın. Ələ salıb, gülürdülər”.
Əməliyyatçılar onu da evində vəkilin iştirakı olmadan axtarış aparıb:
“Xəzər Rayon Polis İdarəsindən çıxarılan zaman polis mənim və Nigarın üzərinə yeridi, əl atıb niqabımızı başımızdan çıxardı. 20 nəfər polisin içərisində üzərimizə qışqırdı ki, “açın da bunu başınızdan, bu nədir?” Onun buna nə haqqı var idi? Hamısını Allaha həvalə edirəm”, – Aytən İbrahimova deyib.
İnanclı qadının 4 azyaşlı uşağı var. Deyir ki, polis evə daxil olarkən, uşaqlar qorxub. Evindən götürülən əşyaların ona məxsus olmadığını bildirən qadının sözlərinə görə, axtarış özünün iştirakı olmadan aparılıb.
“Məni otaqların birində, uşaqların yanında saxladılar. Polislərdən biri də otaqda idi. Evdən yaddaş kartı, mikrokart götürdülər. Halbuki, mən nə o kartları götürmüşəm, nə içindəkilərdən xəbərdaram. Evdən götürülənlərlə fotomu çəkdilər”.
O, qeyd edib ki, polis bölməsində tanımadığı 2 qadın onun üzünə duraraq, əleyhinə ifadə verib:
“Biri yaşlı, digəri nisbətən cavan qadın məni təhqir edir, söyürdülər. Deyirdilər ki, guya mən onların bacısını döymüşəm. Elə şey baş verməyib. Mənə xeyli kağız imzalatdırdılar, amma heç birini oxumağa qoymadılar. Kağızı təzyiq altında imzaladım. Sonra üzümə duran həmin iki qadınla mənim şəklimi çəkdilər”.
İbrahimova həmin ehsan məclisində yalnız 3 qadının iştirak etdiyini, saxlanılan digər qadınların orada olmadığını deyir.
O, bildirir ki, məhkəmədən öncə ona dövlət tərəfindən təyin olunmuş vəkillə danışmağa imkan verilməyib.
Həbsə öncədən hazırlaşıblar?
Avqustun 16-da həbs olunan Şəhla Fərəcova da məhkəmə qarşısına çıxarılıb. Xəzər Rayon Məhkəməsinin hakimi Emin Rüstəmovun qərarına əsasən, o, Cinayət Məcəlləsinin 221.3 (xuliqanlıq, bir qrup şəxs tərəfindən və ya təkrar, silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunduqda) və 233-cü (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) maddələri ilə təqsirləndirilərək, barəsində 3 aylıq həbsqətimkan tədbiri seçilib. Bu maddələrə görə 2 ildən 5 ilədək həbs cəzası nəzərdə tutulur.
Müstəntiq Anar Abbasovun təqdimatına əsasən, Nigar Bağırova, Aytən İbrahimova, Xoşqədəm Quliyeva, Şərqiyyə Sadıqova, Arzu Hüseynova, Şəhla Fərəcova və şəxsiyyəti istintaqla araşdırılan qeyriləri ilə cinayət əlaqələrinə girib, səsgücləndirici vasitələrlə dini nifrət və düşmənçiliyi təbliğ edən şüar və çağırışlar səsləndirib, bayraq nümayiş etdiriblər. Qeyd olunur ki, həmin vaxt küçədən keçən kənar şəxslərlə münaqişə yaradaraq polis əməkdaşlarının qanuni əməlinə tabe olmayıblar.
Təqdimatda bildirilir ki, Şəhla Fərəcova, Nigar Bağırova və Aytən İbrahimova küçədən keçən Elnarə Cəfərova və Aynurə Fərəcovaya hücum çəkərək, qara rəngli bayrağın dirəyindən silah qismində istifadə edərək, yumruq və təpiklə onlara müxtəlif xəsarətlər yetiriblər. Məhkəmədə çıxış edən Şəhla Fərəcova 1-ci qrup əlil olduğunu, özünü təqsirli bilmədiyini və zərərçəkmiş kimi tanınan şəxsləri tanımadığını, onlara xəsarət yetirmədiyini deyib.
Qadınlar bu həbslərin öncədən planlaşdırıldığı qənaətindədirlər. Belə ki, hadisədən 2 həftə əvvəl “Baku TV”də bu qadınlarla bağlı məlumat paylaşılıb. Şəhla Fərəcova ilə bağlı videolar isə “Ar-Rad İnfo” “Telegram” kanalında və “Yağlı xəbər” “YouTube” platformasında yayılıb.
Meydan TV məsələ ilə bağlı aidiyyəti qurumlara – Daxili İşlər Nazirliyi, Ədliyyə Nazirliyi, Baş Prokurorluq və İnsan Hüquqları üzrə Müvəkkilə (Ombudsman) sorğu göndərib, lakin cavab verilməyib.
İnanclıların hüquqlarının müdafiəçisi Arzu Abdulla Gülzaman Meydan TV-yə deyir ki, dini mərasimlərin keçirilməsi cinayət sayıla bilməz. O deyir ki, Daxili İşlər Nazirliyinə müraciət etsə də, ittihamların səbəbləri barədə heç bir açıqlama verilməyib və bu, narahatlıq yaradır:
“Bu qadınlar dini etiqad azadlığından istifadə ediblər. Bu, hər bir vətəndaşın hüququdur. Guya qadınların evlərindən İmam Hüseynin bayrağı, Xamneyinin şəkli, yaddaş kartları və disklər tapılıb. Hamıya məlumdur ki, dindarları narkotiklə həbs etmək üçün bu üsullardan istifadə edirlər. Bunu onlarla adamdan eşitmişəm. Məhkəmə proseslərində dəfələrlə bildirilib ki, özləri ilə Xamneyinin şəkillərini, diskləri və İmam Hüseynin bayrağını gətiriblər, adamların onlarla fotosunu çəkib aparıblar. Eyni proses burada da təkrar olunub. Heç bir fərq qoyulmayıb ki, bunlar qadındır, anadır və evdə uşaqları var”.
