Qafqazagency.ir xəbər verir ki,Beynəlxalq mətbuat azadlığı təşkilatı “Sərhədsiz Reportyorlar” (RSF) mühacirətdə olan müstəqil media orqanları ilə birlikdə Azərbaycanda həbsdə olan jurnalistlərə dəstək üçün kampaniya başladıb.
Kampaniyaya mühacirətdə fəaliyyət göstərən Toplum TV, Azad Səslər Kollektivi, Meydan TV və Qəzetçi qoşulub.
“Onları sərinkeş atəşinə tutun” kampaniyada həbsdə olan jurnalistlərə açıqcalar yazmaq təklif olunur.
Kampaniyanın adında həbsdə olan “Abzas Media” jurnalisti Sevinc Vaqifqızına ailəsinin gətirdiyi sərinkeşin verilməməsi ilə bağlı “qeyri-insani həbs şəraitinə” diqqət çəkilir.
“Əksər məhbuslar yayda ailələrinin dəstəyi ilə sərinkeş əldə edə bildiyi halda, Sevincin ailəsinin gətirdiyi sərinkeş təcridxana rəisi Elnur İsmayılov tərəfindən buraxılmayıb. Onun şərti isə belə olub: jurnalist yazmaqdan əl çəksin. Lakin Vaqifqızı həbsxanadan insan hüquqları pozuntuları və həbs şəraiti barədə yazmağa davam edib — bu cəsarətli addım indi qəsdən qəddarlıqla cəzalandırılır. İsmayılovun ultimatumu açıq senzura və repressiya aktıdır”, – RSF-in bəyanatında deyilir.
Kampaniyaya qoşulan media təşkilatları ictimaiyyəti S.Vaqifqızına və onunla birlikdə həbsdə olan həmkarlarına həmrəylik məktubları yazmağa çağırır. Məktublar bu ünvana göndərilə bilər.
Məktublar daha sonra üzərində simvolik sərinkeş təsviri olan açıqçalara çap ediləcək və birbaşa Bakı İstintaq Təcridxanasına göndəriləcək.
“Biz göstərmək istəyirik ki, onların səsini həbs divarları da boğa bilməz. Azərbaycan hakimiyyəti bu jurnalistləri peşələrinə görə cəzalandırmağı dayandırmalı və onlara dərhal əsas ehtiyaclara çıxış imkanı verməlidir”, – RSF Almaniyanın icraçı direktoru Anca Osterhaus qeyd edib.
Bəyanatda Azərbaycanda 2023-cü ilin noyabrından bəri əksəriyyəti Toplum TV, Meydan TV və “Abzas Media”dan olmaqla ən az 25 jurnalistin həbsdə olduğu xatırladılır.
“Sevinc Vaqifqızı öz müstəqilliyi və cəsarətinin bədəlini ödəyir. İsti dalğasının hökm sürdüyü bir vaxtda jurnalistə sadə bir sərinkeşin belə verilməməsi ilə Azərbaycan hakimiyyəti mətbuat azadlığını sındırmaq üçün hər cür qəddarlığa əl atacağını nümayiş etdirir. Biz ictimaiyyəti və azad mətbuatı dəyərləndirən hər kəsi onun və həmkarlarının yanında həmrəy olmağa çağırırıq”, – RSF-in Şərqi Avropa və Mərkəzi Asiya üzrə rəhbəri Cin Kavelyer qeyd edib.
Kampaniya təşkilatçıları hökumətin “həbsxana daxilində belə artan repressiyalarının daha geniş bir tendensiyanı əks etdirdiyini” bildiriblər.
“Bu, fərqli fikirləri susdurmaq və ölkədə müstəqil jurnalistika üçün qalan son məkanı da dağıtmaq məqsədilə fiziki təzyiqdən, senzura və psixoloji basqılardan istifadədir”, – onlar qeyd ediblər.
