İranın Milli Təhlükəsizliküzrə Ali Şurasının katibi Əli Laricani və Ermənistan Təhlükəsizlik Şurasının katibi Armen Qriqoryan arasında telefon danışığı olub.
Qafqazagency.ir xəbər verir ki, Tərəflər görüş zamanı ikitərəfli münasibətlərin inkişafı, regional sabitlik və təhlükəsizlik məsələlərini müzakirə ediblər. Qriqoryan bildirib ki, Ermənistan və İran arasında əldə olunmuş razılaşmaların icrası davam etdirilməli, yaxın gələcəkdə isə əməkdaşlığın yeni formaları müəyyənləşdirilməlidir. Onun sözlərinə görə, bu, həm regionun təhlükəsizliyi, həm də iqtisadi əməkdaşlığın genişlənməsi baxımından mühüm əhəmiyyət kəsb edir.
Laricani öz növbəsində Ermənistan-İran münasibətlərinin Tehranın xarici siyasətində strateji yer tutduğunu vurğulayıb. O qeyd edib ki, İran üçün Ermənistanla siyasi dialoqun gücləndirilməsi, iqtisadi və nəqliyyat layihələrinin genişləndirilməsi xüsusi əhəmiyyət daşıyır. Laricaninin sözlərinə görə, iki ölkə arasında dostluq və qarşılıqlı etimada əsaslanan münasibətlər gələcəkdə daha da möhkəmlənməlidir.
Görüşdə tərəflərin həm ikitərəfli əməkdaşlıq, həm də regional mühitdə baş verən proseslərə dair fikir mübadiləsi apardığı bildirilir. Analitiklər hesab edirlər ki, Ermənistanla İran arasında əlaqələrin inkişafı Cənubi Qafqazda yeni siyasi və iqtisadi formatların yaranmasına səbəb ola bilər.
