Tbilisi “Əhlibeyt” məscidinin möminlərinin Ərbəin xidməti – FOTO

Qafqazagency.ir xəbər verir ki, Tbilisidə Poçinala bölgəsində (Soğanlıq) Əhlibeyt(ə) məscidinin möminləri Nəcəf–Kərbəla yolunda Ərbəin zəvvarlarına xidmət göstərirlər

Gürcüstanın Tbilisi şəhərinin Poniçala (Soğanlıq) qəsəbəsində yerləşən Əhlibeyt(ə) məscidinin möminləri bu günlərdə müqəddəs bir xidmətdədirlər. Onlar İmam Hüseyn(ə) məhəbbəti və Ərbəin ziyarətinin feyzindən ilhamlanaraq Nəcəf–Kərbəla yolunda zəvvarlara xidmət göstərirlər.

Nurul-Hüseyn xeyməsi – 1053-cü dirək
“Əhlibeyt” məscidinin könüllüləri İraqın müqəddəs torpaqlarında “Nurul-Hüseyn” xeyməsi quraraq 1053-cü dirəkdə zəvvarları qarşılayırlar. Burada hər gün minlərlə insanın ehtiyacları qarşılamaq üçün böyük fədakarlıq nümayiş olunur.

Möminlər zəvvarlara müxtəlif təamlar, təzə bişmiş çörək, isti yeməklər, çay, həmçinin sərinləşdirici içkilər təqdim edirlər. Xeymədə hər kəs sevgi və qardaşlıqla qarşılanır, ziyarətçilərin yorğunluğu çıxarmaq üçün istirahət yerləri də təşkil olunub.

Sevgi ilə edilən xidmət
Xidmətçilər bildirirlər ki, bu yol yalnız qida təqdim etməkdən ibarət deyil – burada əsas məqsəd Əhlibeyt(ə) sevər möminlərin qəlbindəki məhəbbəti və qardaşlığı zəvvarlarla bölüşməkdir. Onlar üçün bu xidmət həm ibadət, həm də böyük bir şərəfdir.

Ərbəin zəvvarlarına göstərilən bu fədakar xidmət, Soğanlıq Əhlibeyt(ə) məscidinin İmam Hüseyn(ə) yoluna olan sadiqliyinin və birliyinin bariz nümunəsidir.