Qafqazagency.ir xəbər verir ki, böyük mərcə təqlid Ayətullahul Uzma Seyid Sistaninin dəftərxanasl Qəzzada hökm sürən dəhşətli humanitar vəziyyətlə bağlı dərin narahatlıq ifadə edən bir bəyanat yayımlayıb və İslam ölkələri ilə beynəlxalq ictimaiyyəti bu böhrana son qoymaq üçün təcili tədbirlər görməyə çağırıb.
Bəyanatda deyilir:
“Bismillahir-Rahmənir-Rahim
Təxminən iki ilə yaxındır ki, fasiləsiz olaraq davam edən qətl və dağıntılardan, və bunun nəticəsində yüz minlərlə şəhid və yaralıdan, şəhərlərin və yaşayış komplekslərinin tamamilə viran qalmasından sonra, bu günlərdə Qəzza zolağında məzlum Fələstin xalqı son dərəcə ağır və dözülməz bir vəziyyətlə qarşı-qarşıyadır. Xüsusilə də ərzaq məhsullarının kəskin çatışmazlığı nəticəsində genişmiqyaslı aclıq baş qaldırmış və uşaqlar, xəstələr, yaşlılar da daxil olmaqla heç kim bundan sığortalanmamışdır.
İşğalçı qüvvələrdən – fələstinliləri öz yurdlarından köç etməyə vadar etmək məqsədilə göstərdikləri davamlı səylərin tərkib hissəsi olaraq – bu cür vəhşicəsinə və fəlakətli əməllərdən başqa bir şey gözlənilməsə də, dünya ölkələrindən, xüsusilə də ərəb və İslam ölkələrindən bu böyük humanitar fəlakətin davam etməsinə icazə verməmələri gözlənilir. Əksinə, bu böhrana son qoymaq üçün səylərini ikiqat artırmalı və bütün imkanlarını səfərbər edərək, işğalçı rejimi və onun havadarlarını, yardım yollarını açmağa və qısa müddət ərzində müdafiəsiz mülki insanlara ərzaq və digər zəruri həyat vasitələrini çatdırmağa məcbur etməlidirlər.
Qəzza zolağında aclığın geniş yayılmasından doğan sarsıdıcı səhnələr, medianın yaydığı kimi, elə səhnələrdir ki, heç bir vicdanlı insanın rahatlıq içində yemək və ya içki qəbul etməsinə imkan verməməlidir. Necə ki, Əmirəlmöminin Əli ibn Əbi Talib (ə), İslam torpaqlarında bir qadına qarşı edilən zülm barədə belə buyurmuşdur:
Əgər bir müsəlman bu hadisədən sonra kədərindən ölsə, bu, məzəmmətə layiq deyil, əksinə mənim nəzərimdə bu, tamamilə yerindədir.
Və la həvla və la quvvətə illə billahil-əliyyil-əzim.
25 iyul 2025“
