Ermənistanın Baş naziri ölkəsinin konstitusiyasının qəbulunun ildönümündə “həqiqi Ermənistan” üçün tamamilə yeni konstitusiyanın hazırlanmasının zəruriliyini bir daha vurğulayıb. Bu addım müxalifət tərəfindən Azərbaycanın təzyiqlərinə boyun əymək kimi qiymətləndirilir.
Qafqazagency.ir-ın məlumatına görə, Ermənistan rəsmiləri ölkə konstitusiyasının qəbulunun 30-cu ildönümünü jurnalistlərin iştirakı olmadan Opera zalında qeyd ediblər. Təbrik çıxışında baş nazir Nikol Paşinyan Ermənistanın yeni konstitusiyaya ehtiyacı olduğunu bir daha vurğulayıb.
Paşinyan bəyan edib: “Ermənistan Respublikasının konkret məqsəd güdən yeni konstitusiyaya ehtiyacı var. Bu konstitusiya Ermənistan Respublikasında bu gün mövcud olan reallığı əks etdirməlidir; bu reallıqda vətən və dövlət artıq eyni anlayış hesab olunur. Amma tarixin bütün dövrlərindən fərqli olaraq, mesajımız çox aydın olmalıdır və bu mesajın konkret təzahürü Ermənistan xalqının azad iradəsi ilə qəbul ediləcək yeni konstitusiya olacaq.”
Paşinyan “həqiqi Ermənistan” üçün yeni əsas qanunun vacibliyini vurğulayıb və bildirib ki, onun təbliğ etdiyi ideologiya hazırkı konstitusiya çərçivəsində tam həyata keçirilə bilməz. O, əvvəlki konstitusiyaların legitimliyini yenidən sual altına alaraq deyib: “1995-ci ildən bəri qüvvədə olan konstitusiyalar ən azı ciddi bir sualı açıq qoyub: bunlar xalqın azad iradəsi ilə qəbul olunubmu?”
Paşinyan çıxışında hazırkı konstitusiyanın preambulasında (giriş) yer alan və onun fikrincə “münaqişəyə səbəb olan” müstəqillik bəyanatına toxunmayıb.
Bakının konstitusiya dəyişiklikləri tələbinə cavab
Qeyd edək ki, bu məsələ Bakı üçün də sülh şərtlərindən biridir. Azərbaycan, Ermənistan müstəqillik bəyanatında ərazi iddialarının olduğunu əsas gətirərək bu dəyişməz müddəanın konstitusiyadan çıxarılmasını tələb edir.
Paşinyan isə bildirib ki, Azərbaycan konstitusiyanın “dəyişdirilməsindən” danışır, amma onun öz mövqeyi “tamamilə yeni konstitusiya” hazırlanmasıdır.
O əlavə edib: “Biz tamamilə yeni konstitusiyanın qəbulundan danışırıq ki, bu, xalqın azad iradəsi ilə həyata keçirilməli və xalq bu konstitusiyanı və ondan doğan hüquqi sistemi özünün hesab etməlidir; elə bir qanun ki, xalqın özü yaratdığı vətən-dövlət üçün olacaq, kənar imperiyalar — İran, Osmanlı və ya SSRİ kimi — tərəfindən deyil.”
Tədbirdə Ermənistan prezidenti Vaaqn Xaçatryan da çıxış edərək mövcud konstitusiyanın yenisi ilə əvəzlənməsinin vacibliyini vurğulayıb və deyib: “Konstitusiya ölü normalar toplusu deyil, dövrün tələbinə və ictimai-siyasi dəyişikliklərə cavab verən canlı sənəd olmalıdır. Yalnız bu şəkildə konstitusiyanın davamlılığı təmin oluna bilər.”
Müxalifət: hökumət xarici təzyiqlərə boyun əyib və qanunu pozur
Digər tərəfdən, tədbiri boykot edən “Parlaq Ermənistan” partiyasının lideri Edmon Marukyan sual edib: “Əgər Paşinyan və digərləri konstitusiyanın əsas prinsiplərini, xüsusən qanunverici, icraedici və məhkəmə hakimiyyətləri arasında balansı pozursa, onda konstitusiyanın ildönümünü nəyə görə qeyd edirlər?”
Marukyan sərt tənqidlə əlavə edib: “Qonşu ölkə [Azərbaycan] suverenliyimizə qarışır, konstitusiyanı dəyişməyə və yeni milli rəmzlər qəbul etməyə məcbur etməyə çalışır — bu halda konstitusiyanın 30 illiyini qeyd etməyə nə əsas var?”
Konstitusiya islahatları şurasının üzvü olan Marukyan bildirib: “Baş nazir və komandası təbrik etməyə vaxt sərf etməsinlər, konstitusiyanı pozmasınlar, bu daha yaxşı olar.”
O, kilsəni müdafiə etdiyi üçün həbs olunan iş adamı Samuel Karapetyanın nümunəsinə işarə edərək əlavə edib: “Milli Məclis özünü məhkəmə kimi aparır və bəyanatlarla hökm çıxarır. Baş nazir isə qanuni səlahiyyətlərini aşaraq anti-konstitusion proseslərə qoşulub.”
