Onların bəziləri sərbəst buraxılsa da, bəzilərinin aqibəti barədə rəsmi məlumat yoxdur
Qafqazagency.ir xəbər verir ki,Azərbaycan diasporunun rəhbəri Şahin Şıxlinski Yekaterinburqda şahid qismində dindirilib.
“Azərbaycan-Ural” ictimai təşkilatının və Azərbaycan diasporunun rəhbəri Şahin Şıxlinski şahid qismində ifadə vermək üçün Sverdlovsk vilayəti üzrə İstintaq Komitəsinə aparılıb.
Bu barədə Şahin Şıxlinskinin oğlu vəkil Mutvalı məlumat verib.
Oğlu bildirib ki, Federal Təhlükəsizlik Xidmətinin əməkdaşları onların ikisini də saxlayıblar. Onların zorakılıqla saxlanması ilə bağlı sosial mediada görüntülər yayılıb.
Daha sonra Mutvalı azad edilib, Şahin Şıxlinski isə dindirilmək üçün İstintaq Komitəsinə aparılıb, daha sonra sərbəst buraxılıb.
Mutvalı Şıxlinskinin fikrincə, saxlanılmanın səbəbi Yekaterinburqda azərbaycanlılara qarşı keçirilən əməliyyatla bağlıdır.
“Lukoyl” şirkətlər qrupunun Uraldakı İstehsalat Birliyinin rəhbəri Əhməd Hacıyevin də Rusiyada saxlanıldığı bildirilir.
Onun sərbəst buraxılması ilə bağlı rəsmi məlumat yoxdur.
Yekaterinburq şəhərinin Leninski Rayon Məhkəməsi Şahid Lalayev barəsində həbs qətimkan tədbiri seçib. O, Rusiya Cinayət Məcəlləsinin qəsdən adam öldürmə və cinayətin təşkili maddələri ilə ittiham olunur. Lalayev iyunun 26-da saxlanılıb və iyulun 19-dək istintaq təcridxanasında qalacaq. Onun saxlanılması Səfərov qardaşlarına qarşı keçirilən əməliyyatlardan bir gün əvvələ təsadüf edir.
İyunun 27-də Rusiya hüquq-mühafizə orqanlarının Yekaterinburqda 2001-ci ildə törədilmiş və uzun illər açılmamış bir qətlin təqsirkarını müəyyənləşdirmək məqsədilə keçirdiyi əməliyyatda 2 azərbaycanlı ölüb, bir neçə nəfər saxlanılıb.
Azərbaycan tərəfi ekpertizadan sonra açıqlayıb ki, həyatlarını itirən iki nəfər – Ziyəddin və Hüseyn Səfərovlar qardaşları xüsusi amansızlıqla qətlə yetiriliblər.
Hadisədən sonra, iyunun 30-da Azərbaycan Daxili İşlər Nazirliyi fəaliyyətinə bu ilin fevralında son verilmiş Rusiyan dövlətinə məxsus “Rossiya Seqodnya” agentliyinin tərkibində olan “Sputnik Azərbaycan”da əməliyyat keçirərək, 7 nəfər saxlayıb.
Onların ikisi barəsində 4 aylıq həbs qətimkan tədbiri seçilib.
Həbs olunanlara qarşı Cinayət Məcəlləsinin 178.3.1-ci (Dələduzluq, mütəşəkkil dəstə tərəfindən törədildikdə) , 192.2.2-ci (Qanunsuz sahibkarlıq, külli miqdarda gəlir əldə etməklə törədildikdə), 192.2.3-cü (Qanunsuz sahibkarlıq, mütəşəkkil dəstə tərəfindən törədildikdə), 193-1.3.1-ci (Cinayət yolu ilə əldə edilmiş əmlakı leqallaşdırma, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə) və 193-1.3.2-ci (Cinayət yolu ilə əldə edilmiş əmlakı leqallaşdırma, xeyli miqdarda törədildikdə) maddələri üzrə ittiham elan olunub.
Daha sonra isə Rusiya Bakıda saxlanılan rusiyalı jurnalistlərə görə, Azərbaycan isə Yekaterinburqda azərbaycanlılara qarşı keçirilən əməliyyata görə bir-birinə qarşılıqlı nota veriblər.
