Tbilisi Cümə məscidində Məhərrəm əzadarlığı keçirilib – FOTO

Qafqazagency.ir xəbər verir ki,Gürcüstanın paytaxtı Tbilisidə yerləşən Cümə məscidində Məhərrəm ayı münasibətilə əzadarlıq mərasimi keçirilib. Məclis Əhli-Beyt (ə) məktəbinə mənsub olan inanclıların iştirakı ilə baş tutub.

Tədbirdə Bütün Gürcüstan Müsəlmanları İdarəsinin şeyxi Hacı Faiq Nəbiyev iştirak edib. Məclisin qonağı olaraq Azərbaycandan gəlmiş ilahiyyatçı Hacı Elbrus Kərimov çıxış edərək Əhli-Beytin (ə) fəzilətlərindən danışıb, Aşura günü Kərbəla çölündə baş verən faciəli hadisələr barədə məlumat verib.

Mərasimdə mərsiyə və nohə ifaları ilə tanınan məddah Cəlal Cəfəri də çıxış edərək İmam Hüseynin (ə) və şəhidlərinin məhəbbətini ifadə edən mərsiyələr oxuyub, iştirakçılara hüzünlü anlar yaşadıb.

Qeyd edək ki, Tbilisi Cümə məscidi şəhərin mərkəzində, tarixi “Köhnə Tiflis” bölgəsində yerləşir və uzun illərdir müsəlman icmasının dini tədbirlərinə ev sahibliyi edir.