Bildirilir ki, “Sputnik Azərbaycan”ın ofisində axtarış Yekaterinburqda baş verən hadisədən sonra iki ölkə arasında münasibətlərin pisləşməsi fonunda aparılır
Azərbaycanın Rusiyadakı səfiri Rəhman Mustafayev bu ölkənin Xarici İşlər Nazirliyinə çağırılıb.
TASS Rusiya XİN-ə istinadən məlumat yayıb.
Rəhman Mustafayevin nazirliyə çağırılmasına səbəb kimi Rusiya Federasiyası jurnalistlərinin saxlanılması göstərilib.
“Sputnik Azərbaycan”da əməliyyat nəticəsində saxlanılan şəxslərin binadan çıxarılması görüntüləri yayılıb. Məlumata görə, həmin şəxslər direktor İqor Kartavıx və əməkdaş Yevgeni Belousovdur.
Rusiya Xarici İşlər Nazirliyinin sözçüsü Mariya Zaxarova “TASS”a bildirib ki, rusiyalı diplomatlar Bakıda olan Rusiya vətəndaşı jurnalistlərlə təxminən iki saat ərzində əlaqə saxlamağa çalışıblar, lakin buna nail ola bilməyiblər.
Nazirlik hadisəni narahatedici adlandıraraq, jurnalistlərin təhlükəsizliyi ilə bağlı narahatlıqlarını ifadə edib.
Qeyd olunur ki, həmin jurnalistlər Azərbaycanda peşəkar fəaliyyətlərini həyata keçirirdilər və onlarla əlaqənin birdən-birə itməsi Rusiya tərəfi üçün təəccüb doğurub.
Hazırda Rusiya tərəfi məsələni aydınlaşdırmağa çalışır və müvafiq diplomatik kanallar vasitəsilə jurnalistlərin vəziyyəti barədə informasiya əldə etməyə çalışır.
Daxili İşlər Nazirliyinin “Sputnik Azərbaycan” agentliyinin ofisində keçirdiyi əməliyyat zamanı iki nəfərin saxlanıldığı bildirilir.
“APA” yazır ki, saxlanılanlar Rusiyanın Federal Təhlükəsizlik Xidmətinin ( FTX) iki əməkdaşlarıdır.
“Sputnik Azərbaycan”ın Bakı ofisində əməliyyat keçirildiyi bildirilir.
Bu barədə hökumətyönlü mətbuat Daxili İşlər Nazirliyinin mətbuat xidmətinə istinadla məlumat yayıb.
“Sputnik Azərbaycan” Rusiyanın dövlətə məxsus “Rossiya Seqodnya” agentliyinin tərkibində fəaliyyət göstərən bir media qurumudur.
Azərbaycanda 2015-ci ilin mayından fəaliyyətə başlayıb.
Ölkə və dünya xəbərlərini Azərbaycan və rus dillərində təqdim edib.
2025-ci ilin fevralında Azərbaycan Xarici İşlər Nazirliyi məlumat yayaraq “Sputnik”in Azərbaycandakı nümayəndəliyinin ləğv olunduğunu bildirib.
XİN-nin məlumatında qeyd olunub ki, qurum yalnız bir müxbir vasitəsilə akkreditasiyadan keçə bilər.
Bildirilir ki, “Sputnik Azərbaycan”ın ofisində axtarış 2000-ci illərin əvvəllərində törədilmiş qətllərə görə Yekaterinburqda Azərbaycan diasporunun nümayəndələrinin kütləvi şəkildə saxlanılmasından sonra yaranmış Rusiya-Azərbaycan arasında münasibətlərin pisləşməsi fonunda aparılır.
