Yəmənin Ənsarullah hərəkatının lideri bu günkü çıxışında Qəzza zolağında davam edən soyqırım qarşısında ərəb və islam ölkələrinin səssizliyini kəskin şəkildə tənqid edib və bildirib ki, bu səssizlik bir növ cinayət və böyük bir xəyanətdir.
Qafqazagency.ir xəbər verir ki,Yəmənin Ənsarullah hərəkatının lideri Seyid Əbdülməlik əl-Husi bu gün – cümə axşamı – Qurban bayramı və Ərəfə günü münasibətilə etdiyi çıxışında deyib: “Bu il Qurban bayramı, Fələstin xalqı üçün görünməmiş bir faciə ilə müşayiət olunur. Soyqırım, ərzaq blokadası və vəhşicəsinə cinayətlər qarşısında dünya ərəblərinin və İslam dünyasının görünməmiş səssizliyi ilə Qəzzada böyük bir faciə baş verir. Bu cinayətlər sionistlər və amerikalılar tərəfindən həyata keçirilir.”
O, bölgə ölkələri və dünyanın digər ölkələrinin sionistlərin cinayətlərinə qarşı səssizliyini tənqid edərək əlavə edib: “Bu utancverici səssizlik və bəzi ərəb və müsəlman rəhbərlərinin sionistlərin Qəzzada keçən iyirmi ay ərzində törətdikləri soyqırım və dəhşətli cinayətlərə ortaq olması, böyük bir rüsvayçılıq və açıq xəyanətdir.”
Əbdülməlik əl-Husi vurğulayıb ki, bu cinayətlər və xəyanətlərlə yanaşı, sionist rejimin müsəlmanların ilk qibləsi olan Əl-Əqsa məscidində törətdiyi cinayətlər də davam edir.
Ənsarullah lideri çıxışının davamında sionistlərin bayraq yürüşü zamanı Həzrət Məhəmməd Peyğəmbərə (s) qarşı hörmətsizlik etdiklərini xatırladaraq deyib: “Onlar İslam Peyğəmbərini (s) təhqir edir, İslam ümmətini alçaldır və Əl-Əqsa məscidinin müqəddəsliyini tapdalayırlar.”
Seyid Əbdülməlik əl-Husi əlavə edib ki, sionist rejim milyonlarla fələstinlini zorla köçürməklə və onların vətənlərinə qayıtmaq hüququnu əlindən almaqla kifayətlənmir, eyni zamanda ABŞ-ın açıq dəstəyi və utancverici bir planla milyonlarla fələstinlini Qəzzadan və İordan çayının qərb sahilindən köçürmək niyyətindədir.
O, çıxışının digər bir hissəsində beynəlxalq ictimaiyyətin səssizliyi fonunda davam edən qeyri-qanuni yaşayış məntəqələrinin tikintisinə toxunaraq deyib: “İsrail yeni qanunsuz yaşayış məntəqələri inşa etməklə fələstinlilərə məxsus torpaqları ələ keçirir və bununla da bütün razılaşmaları, qətnamələri və beynəlxalq təşəbbüsləri pozur.”
Ənsarullah lideri vurğulayıb: “Bu addımlar açıq şəkildə sübut edir ki, bu razılaşmalara güvənmək faydasızdır. Yeganə çıxış yolu Allah yolunda cihaddır; bu yol ilahi yardım və haqq vədəsinə imanla son zəfəri gətirəcək.”
